საგამოძიებო სამსახურმა გამოძიება "სამსახურებრივი უფლებამოსილების გადამეტების" მუხლით დაიწყო და არა "არაადამიანური და დამამცირებელი მოპყრობის" მუხლით, რასაც მზია ამაღლობელი აღწერს და რაც მძიმე კატეგორიის დანაშაულია, შესაბამისად, მძიმე სასჯელით, — ინფორმაციას გამოცემა "ბათუმელები" მზია ამაღლობელის ადვოკატზე დაყრდნობით ავრცელებს.

ადვოკატის შეფასებით, ეს ფაქტი მიუთითებს სპეციალური საგამოძიებო სამსახურის დამოკიდებულებას საქმის შესახებ და იმას, რომ მათ ამ დანაშაულის შემსუბუქება უნდათ.

სპეციალურმა საგამოძიებო სამსახურმა ირაკლი დგებუაძის მიერ ჩადენილი სავარაუდო დანაშაულის შემთხვევა უნდა გამოიძიოს – მზია ამაღლობელის თქმით, დაკავების შემდეგ ირაკლი დგებუაძემ მას სახეში შეაფურთხა, ფიზიკურ ანგარიშსწორებასაც ცდილობდა და დაკავებულს არ აძლევდა წყლის დალევის, ასევე ტუალეტით სარგებლობის საშუალებას.