გერმანიის ბუნდესტაგის საგარეო ურთიერთობათა კომიტეტის თავმჯდომარემ, მიხაილ როთმა, თბილისში მედიასთან შეხვედრისას ჟურნალისტის კითხვას, თუ რა ვარიანტები აქვს ევროკავშირს მაგიდაზე საქართველოსთან დაკავშირებით, იმ ფონზე, როცა შეერთებულმა შტატებმა სანქციები დააწესა, მან უპასუხა, რომ "საქართველოსთან ყველა ვარიანტი მაგიდაზე რჩება, რადგან სიტუაცია უარესდება. ასე რომ ვერ მოვხსნით ინსტრუმენტებს, ვარიანტებს".

"გულწრფელად გითხრათ, ეს არის მწარე რეალობა. სიამოვნებით გეტყოდით, რომ ახლა ჩვენ თანამშრომლობის ახალ სახეზე ვართ, მაგრამ ვერ ვხედავ, რომ აქ თქვენს ქვეყანაში მოვლენები სწორი მიმართულებით იცვლება: სწორი მიმართულებაა ახალი არჩევნები, თავისუფალი და სამართლიანი არჩევნები, დემოკრატიის გაძლიერება, კრიტიკული ხმების დაცვა, მე ვერ ვხედავ ამ ცვლილებას, ამიტომ, ყველა ვარიანტი მაგიდაზე რჩება. მაგრამ ევროკავშირში ყველაფერი უფრო რთულადაა, ვიდრე შეერთებულ შტატებში. მაგალითად, ფიზიკური პირების წინააღმდეგ შორს მიმავალი სანქციების შემოსაღებად საჭიროა ერთსულოვნება მინისტრთა საბჭოში. სამწუხაროდ, აქ არსებულ რეჟიმს ჰყავს გარკვეული მოკავშირეები და მეგობრები ევროკავშირში. გერმანიაში პრორუსული პარტია “ალტერნატივა გერმანიისთვის“, უნგრეთის პრემიერ-მინისტრი, ბატონი ორბანი და სამწუხაროდ, სლოვაკეთის პრემიერ-მინისტრი. ეს უსიამოვნოა. მაგრამ მეორე მხრივ, ეს ნიშნავს, რომ ევროკავშირის წევრი ქვეყნების უდიდესი უმრავლესობა ერთგული რჩება და ისინი არიან თავისუფალი და დემოკრატიული საქართველოს მოკავშირეები და მეგობრები. ჩვენ გვჭირდება დიდი კრეატიულობა, რათა რეჟიმს გავუგზავნოთ მკაფიო გზავნილები, რომ ჩვენთვის მიუღებელია მათი ქცევა და მათი ზომები და რომ ჩვენ ველით კონკრეტულ ქმედებებს თავისუფალი და სამართლიანი არჩევნებისთვის", — აღნიშნა როთმა.

იგი ასევე აღნიშნავს, რომ ძალიან იმედგაცრუებულია იმით, რომ ევროკომისიის და ზოგადად ევროკავშირის ინსტრუმენტები, მაღალი რანგის წარმომადგენლებმა, ევროპარლამენტის გარდა, ვიზიტით საქართველოში არ ჩამოვიდნენ.