მზია ამაღლობელისთვის პროკურატურა აღკვეთის ღონისძიების სახით პატიმრობის შეფარდებას ითხოვს.

პროცესი ხვალ, 14 იანვარს 11:00 საათზეა ჩანიშნული. პროკურატურამ "ბათუმელების“ დამფუძნებელსა და დირექტორს, მზია ამაღლობელს ბრალდება დღეს წარუდგინა, მას პოლიციელზე თავდასხმას ედავებიან. მუხლი 4-დან 7 წლამდე პატიმრობას ითვალისწინებს.

11 იანვრის საღამოს მზია ამაღლობელი ორჯერ დააკავეს. პირველად ის დააკავეს კედელზე პლაკატის გაკვრის გამო. პლაკატზე წერია: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან 4: მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს 2 სხვა პირთან ერთად.

"ბათუმელები“/"ნეტგაზეთი“ ავრცელებს ვიდეოს და ინფორმაციას, რომ მათ დირექტორს, მზია ამაღლობელს ბათუმის პოლიციის უფროსი ირაკლი დგებუაძე აგინებს. გამოცემის ცნობით, ვიდეოში ისმის დგებუაძის სიტყვები: "სისხლით… ბო*იშვილი ვიყო, სისხლით დავიჭერ, ამას მოვუ**ნავ დედის მუ*ელს".