14 მაისს, ჯებირების დაზიანების ბრალდებით დაკავებულ საბა მეფარიშვილს და ომარ ოკრიბელაშვილს შესაძლოა, საპროცესო შეთანხმება გაუფორმდეთ.

ამის შესახებ სასამართლო პროცესზე გახდა ცნობილი, როდესაც მოსამართლე ნათია გუდაძემ დასვა კითხვა, ხომ არ მიმდინარეობდა მხარეებს შორის რაიმე სახის მოლაპარაკება.

აღნიშნულზე პროკურორმა ნუგზარ ჭიტაძემ განაცხადა, რომ ამ დრომდე, მხარეს პროკურატურისთვის თხოვნით, რომ კანონით გათვალისწინებული შეღავათი იყოს მათ მიმართ გამოყენებული, არ მიუმართავს.

"მზად ვიყავით მხარეები დასკვნითი სიტყვები წარმოგვეთქვა და მოცემული სისხლის სამართლის საქმე, თუმცა, მოსამართლემ მხარეებს შეკითხვა დაუსვა, მიმდინარეობდა თუ არა, ან სურდათ თუ არა საპროცესო შეთანხმებაზე შეთანხმების მიღწევა. ბრალდების მხარემ აღნიშნა ის ფაქტი, რომ საბა მეფარიშვილი და ომარ ოკრიბელაშვილი დაკავებული არიან 2024 წლის 16 მაისს და მას შემდეგ, არც ერთი განცხადება პროკურატურაში არ შემოსულა თხოვნით, რომ მათ მიმართ გამოყენებულიყო საპროცესო შეთანხმება. აღნიშნული განმარტების შემდეგ, დაცვის მხარემ გამოთქვა სურვილი, რომ საპროცესო შეთანხმების გაფორმებაზე სურს მოლაპარაკების დაწყება. ეს არ ნიშნავს აპრიორი, რომ მათ საპროცესო შეთანხმება გაუფორმდებათ. ჩვენ მომართვის განხილვის ვალდებულება გაგვაჩნია და წერილობით პასუხს გავცემთ", — განაცხადა ჭიტაძემ.

როგორც სასამართლო პროცესზე საბა მეფარიშვილმა განაცხადა, რომ მას არ სურდა არც ადვოკატი და არც საპროცესო შეთანხმება. მოსამართლემ დაცვის მხარის განცხადების შემდეგ, რომ პროცესი გადადებულიყო, რათა ბრალდებული ჩამოყალიბებულიყო პოზიციაზე, ვინაიდან ის აღელვებული იყო, მოსამართლემ სხდომა 20 იანვრამდე გადადო და თქვა, რომ ამ დრომდე ბრალდებული პოზიციას ჩამოაყალიბებს და პასუხსაც მოიფიქრებს.

შეგახსენებთ, რომ 14 მაისს სამართალდამცავებმა დააკავეს 19 და 23 წლის ახალგაზრდები. ორივეს ბრალი წარდგენილი აქვს სისხლის სამართლის 187-ე მუხლის მე-2 ნაწილის "გ" ქვეპუნქტით, რაც გულისხმობს ნივთის ჯგუფურად დაზიანებას.

გამოძიების ინფორმაციით, ბრალდებულებმა სხვა პირებთან ერთად რკინის ნივთის და ფიზიკური ძალის გამოყენებით მიზანმიმართულად დააზიანეს პარლამენტის შესასვლელთან განთავსებული რკინის დამცავი ჯებირი.