თბილისის საქალაქო სასამართლომ ბექა წიქარიშვილს 69,5 გრამი გამომშრალი მარიხუანის ფლობისთვის 2 000 ლარის გადახდა დააკისრა. ამით სასამართლომ ამ სისხლის სამართლის საქმეზე მსჯელობა დაასრულა.

სასამართლომ თავდაპირველად წიქარიშვილს, სასჯელის სახედ, 3 800 ლარის გადახდა დააკისრა, რაც პატიმრობაში ყოფნის ვადის გათვალისწინებით, შეუმსუბუქდა და საბოლოოდ მას დაენიშნა ჯარიმა 2 000 ლარის ოდენობით.

წიქარიშვილი სამართალდამცავებმა ნარკოტიკული საშუალებების ფლობისთვის 2013 წელს დააკავეს. სისხლის სამართლის კოდექსში ნარკოტიკული საშუალებების უკანონო მოხმარებისთვის (273-ე მუხლი), კანონის იმ დროს მოქმედი რედაქციით, შვიდიდან 14 წლამდე თავისუფლების აღკვეთა იყო გათვალისწინებული. წიქარიშვილმა სისხლის სამართლის კოდექსში არსებული სასჯელი საკონსტიტუციო სასამართლოში გაასაჩივრა.

საკონსტიტუციო სასამართლოს 2015 წლის 24 ოქტომბრის გადაწყვეტილებით, დაკმაყოფილდა წიქარიშვილის სასარჩელო მოთხოვნა. ამ გადაწყვეტილებით, 70 გრამამდე გამომშრალი მარიხუანის პირადი მოხმარებისთვის შეძენა-შენახვისთვის თავისუფლების აღკვეთით დასჯა არაკონსტიტუციურია.