ბიძინა ივანიშვილი ჟურნალისტებთან დღეს, 14 ივნისს, მორიგ შეხვედრას მართავს, რომელიც ტექნოლოგიურ პარკში იმართება.

ნეტგაზეთის კითხვას, რატომ არ უგზავნიდა მოსაკ ფონსეკას პასპორტის ასლს და რატომ არ შეიტანა დეკლარაციაში Lynden Management Ltd, ივანიშვილმა უპასუხა, რომ ასეთი რამ პირველად ესმის.

"მე პირველად მესმის, რომ ვიღაცას პასპორტის ასლი არ გავუგზავნე. პანამის დოკუმენტები არ არის ჩემთვის ბოლო ჭეშმარიტება. უამრავი ოფშორული კომპანია მქონია".

ივანიშვილის თქმით, მას არ ახსოვს კომპანია Lynden Management Ltd, ხოლო ის ყოველწლიურ დეკლარაციებს ყოველთვის სწორად ავსებდა.

ყოფილმა პრემიერმა ასევე თქვა, რომ ოფშორული ზონა მისთვის გადასახადების დამალვას არ ნიშნავს და ისინი მას მოქნილობაში ეხმარება:

"ის, რომ ბიზნესმენს ოფშორში კომპანიები აქვს, ამასთან კითხვები არ არის. კითხვები უნდა დაუსვათ პოლიტიკოსებს, რომლებიც პოლიტიკაში მოსვლის შემდეგ გამდიდრდნენ. ეს კითხვები მე არ მეხება".

ბიძინა ივანიშვილი 2012-2013 წლებში საქართველოს პრემიერმინისტრი იყო და მან წლიური დეკლარაციები 2-ჯერ შეავსო.

მის დეკლარაციებში ნახსენები არაა ოფშორულ ზონაში რეგისტრირებული კომპანია Lynden Management Ltd, რომელიც პანამის დოკუმენტების მიხედვით, საქართველოს ყოფილი პრემიერ მინისტრის ბიძინა ივანიშვილის საკუთრებაა.

იურიდიული ფირმა მოსაკ ფონსეკა, რომელიც კომპანიებს ოფშორულ ზონებში არეგისტრირებდა, 3 წლის მანძილზე ცდილობდა მოეპოვებინა ივანიშვილის პირადობის დამადასტურებელი საბუთები და Lynden Management Ltd-ის მფლობელობაში არსებული თანხების წყარო თუმცა, უშედეგოდ.

ბიძინა ივანიშვილმა ჟურნალისტებთან შეხვედრა გასულ კვირასაც გამართა. მან ტელევიზიის წარმომადგენლების კითხვებს 7 ივნისს უპასუხა.