12-მა ევროპულმა ქვეყანამ ერთობლივი განცხადება გაავრცელა, რომელშიც წერია, რომ რუსეთის "ჩრდილოვანი ფლოტი" საფრთხეს უქმნის გარემოს, საზღვაო უსაფრთხოებას და საერთაშორისო საზღვაო ვაჭრობას, შესაბამისად, ჩრდილოვანი ფლოტის მოშლისა და შეკავებისთვის, მის მიერ წარმოქმნილ რისკებთან დასაპირისპირებლად აღნიშნული ქვეყნები ერთიანდებიან.

მათი თქმით, ერთობლივი გადაწყვეტილება მოიცავს მუშაობას უკანონო ოპერაციების თავიდან ასაცილებლად და რუსეთის ხარჯების გასაზრდელად.

"გაერთიანებულნი ვართ საერთო გადაწყვეტილებაში, გადავდგათ შემდგომი კოორდინირებული ნაბიჯები რუსეთის "ჩრდილოვანი ფლოტის" მოშლისა და შეკავებისთვის, მის მიერ წარმოქმნილ რისკებთან დასაპირისპირებლად, ერთად ვიმუშაოთ უკანონო ოპერაციების თავიდან ასაცილებლად და რუსეთის ხარჯების გაზრდის მიზნით.

ის ასევე მუშაობს ჩვენი სანქციების გვერდის ავლასა და მათი გავლენის შერბილებაზე. მონაწილე სახელმწიფოების მიერ შეგროვებული ინფორმაცია, მათ შორის იმ გემებთან დაკავშირებით, რომლებიც გადაწყვეტენ არ უპასუხონ მოთხოვნებს, შეფასდება და დამუშავდება ჩვენს საერთაშორისო პარტნიორებთან ერთად. "ჩრდილოვანი ფლოტის" გემებს და მათ ხელის შემწყობებს ეჭვი არ უნდა ეპარებოდეს: მტკიცედ გვაქვს გადაწყვეტილი, ანგარიშვალდებული გავხადოთ ისინი, მათ შორის სანქციებთან დაკავშირებული ქმედებებით იმ რისკებისთვის, რასაც წარმოადგენენ და მხარდაჭერისთვის, რომელსაც ისინი უკრაინის წინააღმდეგ რუსეთის ომს უწევენ", — აღნიშნულია განცხადებაში.

განცხადებას ხელს აწერენ: დანია, ესტონეთი, ფინეთი, გერმანია, ისლანდია, ლატვია, ლიეტუვა, ნიდერლანდები, ნორვეგია, პოლონეთი, შვედეთი და გაერთიანებული სამეფო.