ნეტგაზეთის ინფორმაციით, აფხაზეთის დე ფაქტო რესპუბლიკის საგარეო საქმეთა სამინისტროს ხელმძღვანელმა, სერგეი შამბამ, რუსეთის მიერ "ორმაგი მოქალაქეობის მქონე" აფხაზი სტუდენტების სამხედრო აღრიცხვასა და გაწვევაზე ისაუბრა.

მან განაცხადა, რომ რუსეთში მცხოვრები აფხაზი სტუდენტების შესახებ ამ საკითხის გადასაწყვეტად ვლადიმირ პუტინის დამატებითი განკარგულებაა საჭირო. შამბას თქმით, სამხედრო რეგისტრაციის გავლა მის შვილიშვილსაც მოეთხოვა.

"უბრალოდ ლოიალურად იქადნიდნენ ცოტა ხნის განმავლობაში, თვალს ხუჭავდნენ და არ ითხოვდნენ. ახლა კი ამას ითხოვენ. ეს არ ნიშნავს იმას, რომ მათ დაუყოვნებლივ გაიწვევენ ჯარში, მაგრამ სკოლის დამთავრების შემდეგ, თუ ამ დროისთვის კანონი ორმაგი მოქალაქეობის შესახებ არ ამოქმედდება, რუსეთში დარჩენის შემთხვევაში შესაძლოა, ჯარში გაიწვიონ", — განაცხადა შამბამ, როგორც ნეტგაზეთი წერს.

მისი თქმით, სწავლის დასრულების შემდეგ აფხაზი სტუდენტების სამშობლოში დაბრუნებით კმაყოფილია,. ამის მიუხედავად, აღნიშნავს, რომ ახალგაზრდა პროფესიონალებს აფხაზეთში სამსახურის შოვნა უჭირთ.

ცნობისთვის, 2022 წელს აფხაზეთისა და რუსეთის შეთანხმების თანახმად, “პირები, რომლებიც არიან ორივე მხარის მოქალაქეები, გადიან სამხედრო სამსახურს იმ მხარეში, რომლის ტერიტორიაზეც მუდმივად ცხოვრობენ გაწვევის დროს”.