თბილისის მერია განცხადებას ავრცელებს, რომელშიც მოუწოდებს რუსთაველი გამზირზე მყოფ მომიტინგეებს, რომ პარლამენტის წინ განთავსებული ნაძვის ხის კონსტრუქციაზე, უსაფრთხოების მიზნით არ ავიდნენ, რადგან მისი მონტაჟი არ არის დასრულებული.

"გაცნობებთ, რომ დედაქალაქში დაწყებული წინასაახალწლო სამუშაოების ფარგლებში, რუსთაველის გამზირზე, პარლამენტის შენობის მიმდებარე ტერიტორიაზე დაიდგა ნაძვის ხის კონსტრუქცია, რომლის მონტაჟიც არ არის საბოლოოდ დასრულებული და არ არის უსაფრთხო.

მოვუწოდებთ საპროტესტო აქციის მონაწილეებს, არავითარ შემთხვევაში არ ავიდნენ აღნიშნულ კონსტრუქციაზე, მათივე უსაფრთხოებიდან გამომდინარე.

საზოგადოებას შევახსენებთ, რომ დედაქალაქის მთავარი ნაძვის ხის მონტაჟი დღეს დაიწყო და სამუშაოები კიდევ რამდენიმე დღის განმავლობაში გაგრძელდება", — წერს უწყება.