"ძალაუფლების აღება ნიშნავს პასუხისმგებლობის აღებასაც და ქვეყნის ტრაგედიამდე არ მიყვანას!", — წერს პრეზიდენტი სალომე ზურაბიშვილი და საპროტესტო აქციაზე მყოფი შვილის დასახმარებლად წასული დედის გარდაცვალებას ეხმაურება.

"ოჯახის მწუხარებას და სრულიად საქართველოს მწუხარებას ვიზიარებ.

ძალაუფლების აღება ნიშნავს პასუხისმგებლობის აღებასაც და ქვეყნის ტრაგედიამდე არ მიყვანას! — გახსოვდეთ ყველას, ვინც დღეს საკუთარ ხალხის ტკივილს და წუხილს არ იზიარებს და კიდევაც დასცინის, რომ დრონი მეფობენ!", — წერს პრეზიდენტი.

ინფორმაცია უბედური შემთხვევის შესახებ ჯიპიაი ჰოლდინგმა გაავრცელა.

"დიდი მწუხარებით ვიუწყებით, რომ დღეს, გამთენიისას, ტრაგიკულად დაიღუპა ჩვენი კოლეგა. ახალგაზრდა ქალი საპროტესტო აქციაზე მყოფი შვილის დასახმარებლად მიდიოდა, როდესაც ავტოავარიაში მოყვა.

ავტომობილში იმყოფებოდა ჩვენი კოლეგის დედაც, რომელიც მრავლობითი მოტეხილობებით იმყოფება ამჟამად კლინიკაში და მის გადასარჩენად ექიმები იბრძვიან.

ჩვენთვის უდიდესი ტკივილია იმის გაცნობიერება, რომ მიმდინარე მოვლენები ადამიანისთვის ყველაზე ძვირფასს, სიცოცხლეს ემუქრება. ვუსამძიმრებთ და გვერდში ვუდგავართ ჩვენი კოლეგის შვილებს, ოჯახის წევრებსა და ახლობლებს.

ამ ეტაპზე, დამატებით დეტალებს ოჯახის თანხმობის გარეშე ვერ გავავრცელებთ", — ნათქვამია ჯიპიაი ჰოლდინგის მიერ გავრცელებულ ინფორმაციაში.

მოგვიანებით კომპანიამ ოჯახის თხოვნით ტექსტი შეასწორა და დაწერა, რომ მათი კოლეგა არა "აქციაზე მყოფი შვილის დასახმარებლად მიდიოდა, როდესაც ავტოავარიაში მოყვა", არამედ "ახალგაზრდა ქალი საპროტესტო აქციაზე მიდიოდა, როდესაც ავტოავარიაში მოყვა".

განცხადება

განცხადება