ესტონეთის საგარეო საქმეთა სამინისტროს საერთაშორისო თანამშრომლობის, ვაჭრობისა და ბიზნეს დიპლომატიის მდივნის მოადგილემ, მარინ რატნიკმა განაცხადა, რომ ესტონეთი საქართველოს განათლების სამინისტროსთან თანამშრომლობას ვეღარ გააგრძელებს.

ერთობლივ საგანმანათლებლო პროექტებს შორის უდიდესი, რომელიც საქართველოს ეთნიკური უმცირესობების თემებში ორენოვანი სწავლების დანერგვაში კოოპერაციას ეხებოდა, მიმდინარე წელს დასრულდება.

რატნიკის თქმით, თავისუფალი მედიისა და სამოქალაქო საზოგადოების მხარდამჭერი პროექტები გაგრძელდება. მაგალითად, დაახლოებით 100000 ევროს ღირებულების პროექტი, რომელიც ჟურნალისტებისათვის სტიპენდიებსა და ჯილდოს გასცემს, 2025 წლის შუამდე გაგრძელდება.

"უპირველეს ყოვლისა, ჩვენ საქართველოში მიმდინარე პოლიტიკურ პროცესებს უნდა დავაკვირდეთ. ჩვენ, რა თქმა უნდა გავაგრძელებთ პროექტებს, რომლების გაგრძელებაც დღეს შეგვიძლია. წამოვიწყებთ თუ არა ახლებს, ამას დრო გვიჩვენებს", — განაცხადა რატნიკმა.