თავდაცვის ყოფილი მინისტრი, თავით კეზერაშვილი მის სახლში ჩატარებული ჩხრეკის შედეგად დიდი რაოდენობით ცეცხლსასროლი იარაღის ამოღებას ეხმაურება და ამბობს, რომ იარაღის ნაწილი მას ეკუთვნის და მასთან არანაირი შეხება არასდროს ჰქონია დიმიტრი ჩიქოვანს.

კეზერაშვილი ამის შესახებ Facebook-ზე ავრცელებს განცხადებას.

იგი ასევე აღნიშნავს, რომ ჩხრეკის შედეგად ამოღებული იარაღის შესახებ წლებია სრული ინფორმაცია ჰქონდა შსს-ს და სასამართლოს, რომელიც სხვა ქონებასთან ერთად არაერთხელ დაყადაღდა. ამასთან, მან დასძინა, რომ ყველაფერი, რაც არ არის გაფორმებული "უწყების მიერ არის ჩადებული".

"ე.წ. შინაგან საქმეთა სამინისტროს მიერ გავრცელებულ ინფორმაციასთან დაკავშირებით დაინტერესებულ საზოგადოებას მინდა ვუთხრა, რომ ჩემს საკუთრებაში არსებული სახლის, რომელშიც 2012 წლის შემდეგ არავის უცხოვრია, ჩხრეკისას ამოღებული იარაღის ნაწილი მეკუთვნის მე და მასთან არანაირი შეხება არასოდეს არ ქონია დიმიტრი ჩიქოვანს. იარაღი, რომელიც ინახებოდა ჩემს სახლში, დავტოვე 2012 წლის ოქტომბერში საქართველოდან იძულებით გამომგზავრების წინ, გაფორმებულია და ინახებოდა კანონის სრული დაცვით. ამ იარაღის არსებობის შესახებ წლებია სრული ინფორმაცია ჰქონდა, როგორც ე.წ. შსს-ს, ასევე სასამართლოს, რომელიც ჩემ სხვა ქონებასთან ერთად არაერთხელ იქნა დაყადაღებული. ყველაფერი, რაც არ არის გაფორმებული, არის ამ ე.წ. უწყების მიერ ჩადებული. ჩემი და ჩემი ოჯახის წევრების პოლიტიკური ნიშნით დევნა 12 წელზე მეტია გრძელდება, თუმცა ეს არაფერია იმასთან შედარებით, რასაც გომელაურის კრიმინალური დაჯგუფება უკეთებს საქართველოს თავისუფლების მოყვარულ ხალხს თბილისისა და სხვა ქალაქების ქუჩებში. საქართველოში დაშინებას და დევნას შედეგი არც აქამდე გამოუღია და არც მომავალში გამოიღებს", — წერს კეზერაშვილი სოციალურ ქსელში.