ბათუმში, აქციის მონაწილეებმა მიიღეს დაპირება, რომ აჭარის საზოგადოებრივი მაუწყებელი მათ პირდაპირ ეთერს დაუთმობს. აჭარის საზმაუს ხელმძღვანელობის თქმით, ეთერი 4-4 ადამიანს დაეთმობა. პირდაპირი ეთერი რამდენიმე წუთში დაიწყება.

ბათუმში აქციები უკვე რამდენიმე დღეა მიმდინარეობს, აქციის მონაწილეები მოითხოვს მიმდინარე მოვლენების სათანადო გაშუქებას. პროტესტმა საზმაუს შენობასთან კიდევ ერთხელ მას შემდეგ გადაინაცვლა, რაც აჭარის საზმაუს ჟურნალისტმა და ტელეწამყვანმა ირინა ყურუამ გაავრცელა ინფორმაცია, რომ ტელევიზია დეკემბრის განმავლობაში გარკვეულ გადაცემებს აჩერებს. აქციის მონაწილეები მოითხოვენ დაუყოვნებლივ აღდგეს ყველა დახურული გადაცემა ან გადადგეს ტელევიზიის დირექტორი ლადო ტატიშვილი.

"მეგობრებო, ხუთშაბათს, 21:00-ზე ვეღარ შეგხვდებით აჭარის ტელევიზია • Ajara TV - საზოგადოებრივი მაუწყებელი -ის პირდაპირ ეთერში. ბოდიშს გიხდით, რომ უკვე ვერ შემოგთავაზებთ განსხვავებულ მოსაზრებებს, კრიტიკულ აზრს, საქართველოს ევროპული მომავლისთვის მებრძოლი ადამიანების ანალიზს...

ბოდიში, რომ კონსტიტუციის დაცვის საშუალება ამჯერად არ მეძლევა..
ბოდიში, რომ ვეღარ ვიცავ კანონს "მაუწყებლობის შესახებ" და ვეღარ ვასრულებ ვალდებულებებს, რომელიც პირველ რიგში, საზოგადოების ინტერესების გათვალისწინებას გულისხმობს...

ბოდიში, რომ ამ კვირის ხუთშაბათს პირდაპირი ეთერიდან უკვე ვერ გეტყვით, რომ რუსეთი ოკუპანტია; რომ მიუღებელია ძალადობა მედიაზე, საკუთარ მოქალაქეებზე, ახალგაზრდებზე;
გადაცემა "სათქმელის" და სხვა გადაცემების გაჩერების საბოლოო გადაწყვეტილება მიიღო და დღეს პირისპირ შეხვედრისას დამიდასტურა დირექტორმა - ლადო ტატიშვილმა.
ვფიქრობ, რომ ახლა როგორც არასდროს, უნდა მოვიკრიბოთ პროფესიონალიზმი და საზოგადოებას კი არ დავემალოთ, არამედ, ყველა გადაცემიდან ველაპარაკოთ სიმართლეზე და რისკებზე.

გაჩერებულია ყველა გადაცემა, რომელიც პირდაპირ ეთერში გადაიცემოდა. მუშაობს მხოლოდ საინფორმაციო სამსახური და საინფორმაციო გამოშვება. რა იქნება მომავალ კვირას ან ზოგადად - მომავალში, გაურკვეველია!" — წერს ირინა ყურუა სოციალურ ქსელში.

შეგახსენებთ, აჭარის საზოგადოებრივ მაუწყებელთან ამ წუთებში მასშტაბური საპროტესტო აქცია მიმდინარეობს.