რუსული მედიები ქვეყნის თავდაცვის სამინისტროზე დაყრდნობით ინფორმაციას ავრცელებენ, რომლის მიხედვითაც უკრაინის შეიარაღებულმა ძალებმა ბრიანსკის ოლქს ATACMS-ის ექვსი ბალისტიკური რაკეტის გამოყენებით დაარტყა.

"მტერმა ბრიანსკის ოლქის ტერიტორიაზე განთავსებულ ობიექტს ექვსი ბალისტიკური რაკეტით დაარტყა. დადასტურებული მონაცემებით, გამოყენებულია ამერიკული წარმოების ATACMS-ის ოპერატიულ-ტაქტიკური რაკეტები", — აცხადებენ უწყებაში.

როგორც მედიები იუწყებიან, რუსეთის საჰაერო თავდაცვის სისტემებმა ჩამოაგდეს 5 რაკეტა, მეექვსე კი დააზიანეს. ჩამოვარდნილი ჭურვის ფრაგმენტები დაეცა სამხედრო ობიექტის ტექნიკურ ტერიტორიას, რამაც ხანძარი გამოიწვია.

ამასთან, რუსეთი თავდაცვის სამინისტრო ამტკიცებს, რომ თავდასხმას მსხვერპლი არ მოჰყოლია და არც არავინ დაშავებულა.

ცნობისთვის, კვირას გავრცელდა ინფორმაცია, რომ ჯო ბაიდენის ადმინისტრაციამ უკრაინას რუსეთის წინააღმდეგ შორ მანძილზე მოქმედი იარაღის, მათ შორის ATACMS-ის რაკეტების გამოყენების ნება დართო.