სპეცრაზმის პლაცდარმად თსუ-ის ტერიტორიის გამოყენება მშვიდობიანი მომიტინგეების დასაშლელად და დასარბევად, უხეშად არღვევს აკადემიური სოციალური პასუხისმგებლობის ყველა სტანდარტს!, — ამის შესახებ სოციალურ ქსელში პროფესორი, სოციოლოგი იაგო კაჭკაჭიშვილი წერს და თსუ-ს რექტორს ჯაბა სამუშიას მიმართავს, რომ გააკეთოს ოფიციალური განცხადება იმასთან დაკავშირებით, ჰქონდათ თუ არა ინფორმაცია სპეცრაზმის თსუ-ის ეზოში მობილიზაციასთან დაკავშირებით.

იაგო კაჭკაჭიშვილის თქმით, 19 ნოემბერს, გამთენიისას, სავარაუდოდ, თსუ-ს პირველ და მეორე კორპუსებს შორის არსებულ ჭიშკარში სპეცრაზმელები შედიან და უნივერსიტეტის ტერიტორიას იკავებენ.

"მივმართავ თსუ-ის აკადემიურ საბჭოს და პირადად რექტორს.

ბ-ნო ჯაბა!

კომენტარში დართულ ლინკზე ჩანს, როგორ შედიან თსუ პირველ და მეორე კორპუსებს შორის არსებულ ჭიშკარში სპეცრაზმელები (სავარაუდოდ, გამთენიისას) და იკავებენ უნივერსიტეტის ტერიტორიას!

გთხოვთ, გააკეთოთ ოფიციალური განცხადება იმასთან დაკავშირებით, გქონდათ თუ არა ინფორმაცია სპეცრაზმის თსუ-ის ეზოში მობილიზაციასთან დაკავშირებით?

ასევე, ველით თქვენს შეფასებას აღნიშნულ ფაქტთან დაკავშირებით. კერძოდ, რამდენადაც შეესაბამება იგი უნივერსიტეტის ე.წ. "მესამე მისიას", რომელიც გულისხმობს თსუ-ის მონაწილეობას საზოგადოების ეკონომიკურ, სოციალურ და კულტურულ განვითარებაში?

პირადად ჩემი პასუხი, მოკლედ, ასეთია: სპეცრაზმის პლაცდარმად თსუ-ის ტერიტორიის გამოყენება მშვიდობიანი მომიტინგეების დასაშლელად/დასარბევად, უხეშად არღვევს აკადემიური სოციალური პასუხისმგებლობის ყველა სტანდარტს!" — წერს იაგო კაჭკაჭიშვილი.

შეგახსენებთ, რომ დღეს, 19 ნოემბრის დილით, პოლიციამ საპროტესტო აქციის მონაწილეებისგან გაათავისუფლეს ჭავჭავაძის გამზირი და თსუ-ს პირველი კორპუსის მიმდებარე ტერიტორია. გავრცელებული ინფორმაციით გამოიყენებს წიწაკის სპრეი და დაშავდა ერთი ადამიანი, რომელიც სასწრაფო დახმარების ბრიგადით ტერიტორიიდან გაიყვანეს. შსს-ს ცნობით დაკავებულია 16 ადამიანი.

საპროტესტო აქციის დაშლას გამოეხმაურა საია, მედია ადვოკატირების კოალიციამ, დემოკრატიის კვლევის ცენტრი, სახალხო დამცველის აპარატი, ცალკე განცხადება გაავრცელა ამავე აპარატის ხუთმა თანამშრომელმა.

მმართველი პარტიის ლიდერმა, მამუკა მდინარაძემ კი შსს მინისტრ ვახტანგ გომელაურს და პოლიციას მადლობა გადაუხადა აქციის ჭავჭავაძის გამზირის აქციის მონაწილეებისგან გათავისუფლებისთვის, დედაქალაქის მერის, კახა კალაძის თქმით კი, როცა "კეტავ გზებს, არ გყავს ხალხის საკმარისი რაოდენობა, ამას მოჰყვება რეაგირება".