ქართული არჩევნების შეფასებისას ევროპარლამენტარი მარკეტა გრეგოროვა აცხადებს, რომ პირადად შეესწრო ქვეყნის სხვადასხვა კუთხეში გაყალბების ფაქტებს. ამის შესახებ მან ევროპარლამენტში გამართულ დებატებზე განაცხადა.

"სამი კვირის წინ, მე პირადად შევესწარი მანიპულირებას ქვეყნის სხვადასხვა კუთხეში, ბიულეტენების ჩაყრის შოკისმომგვრელ შემთხვევებს, გაყალბების ფაქტებს, ამომრჩეველთა ფარულობის არარსებობასა და დაშინებას",— განაცხადა ევროპარლამენტარმა.

მისი თქმით, 2021 წლისგან განსხვავებით, 2024 წლის არჩევნებზე გაყალბება თვალსაჩინო იყო.

"2021 წლის საქართველოს არჩევნებზე დამკვირვებელი ვიყავი და პირდაპირი მანიპულირება არ მინახავს. თუმცა, მაშინაც კი ვფრთხილობდით არ გვეთქვა, რომ არჩევნები სამართლიანი იყო, ამომრჩეველზე თვალთვალისა და იძულებითი საარჩევნო კამპანიის დაფინანსების შეუსაბამობის გამო“, — განაცხადა მარკეტა გრეგოროვამ.

მისივე თქმით, ეს ყველაფერი ბოლო თვეების განმავლობაში საქართველოს მთავრობის მიერ დემოკრატიული უკუსვლის ნაწილი იყო.

"გვჭირდება ამ დარღვევების გამოძიება, ასევე სანქციები პასუხისმგებელი პირების წინააღმდეგ. დემოკრატიისკენ სამართლიან სწრაფვაში ჩვენ ქართველი ხალხის გვერდით მტკიცედ უნდა დავდგეთ", — აღნიშნა ევროპარლამენტარმა.