CNN-ის ცნობით, დონალდ ტრამპმა ეროვნული უსაფრთხოების საკითხებში მრჩევლის თანამდებობა ფლორიდელ კონგრესმენ მაიკ უოლცს შესთავაზა. ეროვნული უსაფრთხოების მრჩეველი პრეზიდენტს აშშ-ისთვის არსებულ სხვადასხვა საფრთხეზე უწევს კონსულტაციას. უოლცს, სავარაუდოდ, მოუწევს აშშ-ის პოზიციის განსაზღვრაში მონაწილეობა ისრაელსა და უკრაინაში რუსეთის ომთან დაკავშირებით.

აღსანიშნავია, რომ უოლცი ჩინეთის მიმართ კრიტიკული დამოკიდებულებით გამოირჩევა. ის გასულ კვირას კონგრესში აირჩიეს, თუმცა თუ მედიაში გავრცელებული ცნობები გამართლდება, თანამდებობის დატოვება მოუწევს. მისი დანიშვნა სენატის თანხმობას არ საჭიროებს. ასევე, სავარაუდოა, რომ სენატორი მარკო რუბიო სახელმწიფო მდივნობის კანდიდატად განიხილება.

როგორც უოლცი, რუბიოც ანტიჩინური განწყობებით გამოირჩევა. სწორედ მის მიერ იყო ინიცირებული 2019 წელს ჩინური TikTok-ის წინააღმდეგ დაწყებული მოკვლევა. ასევე, ის ბაიდენის ადმინისტრაციისგან Huawei-ს გაყიდვების შეზღუდვას ითხოვდა მას შემდეგ, რაც ჩინურმა ტექნოლოგიურმა კომპანიამ ახალ ლეპტოპებში Intel AI პროცესორის ჩიპი გამოიყენა. ჩინეთმა 2020 წელს რუბიო დაასანქცირა კიდეც.

ასევე, თავდაცვის მდივნის პოზიციაზე ერთ-ერთ პოტენციურ კანდიდატად სახელდება მაიკ პომპეო, ყოფილი კონგრესმენი, რომელიც ტრამპის ყოფილ ადმინისტრაციაში ცენტრალური სადაზვერვო სააგენტოს დირექტორად და სახელმწიფო მდივნად მსახურობდა.

ის ისრაელის მხარდამჭერია და მხარს უჭერდა აშშ-ის საელჩოს თელ-ავივიდან იერუსალიმში გადატანას.

შესაბამისად, გავრცელებული ცნობებით, დონალდ ტრამპი ადმინისტრაციაში ჩინეთის მიმართ კრიტიკული პოლიტიკოსების კანდიდატურებს განიხილავს.