პრემიერის განცხადებით, თუ ოპოზიციური პარტიები კონსტიტუციური წყობილების წინააღმდეგ სიარულს გააგრძელებენ, შეიძლება მათი არაკონსტიტუციურად გამოცხადების საკითხი განიხილონ. მისივე თქმით, "იმდენად დასუსტებულია დღეს ოპოზიცია, რომ შეიძლება ასეთი ზომების მიღება აღარც გახდეს აუცილებელი, თუმცა ქვეყნის გრძელვადიანი სტაბილური განვითარებისთვის ცუდი არ იქნებოდა".

"ჩვენ გვქონდა წინასაარჩევნო პერიოდში საუბარი პოლიტიკური პარტიების არაკონსტიტუციურად გამოცხადებაზე. ჩვენ ამას ვუკავშირებდით საკონსტიტუციო უმრავლესობის მიღებას, თუმცა თუ ასე გააგრძელეს ამ ადამიანებმა, შეიძლება საკონსტიტუციო უმრავლესობის გარეშეც გადავდგათ ეს ნაბიჯი. თუ ისინი გააგრძელებენ კონსტიტუციური წყობილების წინააღმდეგ წასვლას, ამ შემთხვევაში ისინი მოამწიფებენ შესაბამის გადაწყვეტილებას, თუმცა კიდევ ერთხელ გავიმეორებ, რომ ამის რესურსი მათ ნაკლებად აქვთ, შესაბამისად, მგონია, რომ ძალიან მალე ისინი გაჩერდებიან, შესაბამის ინსტრუქციებსაც მიიღებენ და საბოლოო ჯამში, არ ვიცი სამწუხაროდ თუ საბედნიეროდ, ისინი აღმოჩნდებიან პარლამენტში სკამებზე.

აქ საუბარია საკონსტიტუციო სარჩელის შეტანაზე, რასაც სჭირდება დეპუტატების მცირე რაოდენობა. ეს არის აბსოლუტურად საკმარისი. თუ გააგრძელებენ კონსტიტუციური წყობილების წინააღმდეგ სიარულს, ამ შემთხვევაში შეიძლება განვიხილოთ ჩვენ ეს საკითხი. მეორე მხრივ, იმდენად დასუსტებულია დღეს ოპოზიცია, რომ შეიძლება ასეთი ზომების მიღება აღარც გახდეს აუცილებელი, თუმცა ცუდი არ იქნებოდა ქვეყნის გრძელვადიანი სტაბილური განვითარებისთვის", — განაცხადა პრემიერმინისტრმა.

შეგახსენებთ, რომ მმართველი პარტიის ოთხიდან ერთ-ერთი წინასაარჩევნო დაპირება, საკონსტიტუციო უმრავლესობის მიღების შემთხვევაში, სწორედ "კოლექტიური ნაცმოძრაობის" აკრძალვა იყო. თუმცა, ამ საკითხზე მაშინ ურთიერთგამომრიცხავ განცხადებებს აკეთებდნენ პარტიის საპატიო თავმჯდომარე ბიძინა ივანიშვილი, პრემიერმინისტრი ირაკლი კობახიძე და ქალაქის მერი კახა კალაძე. "კოლექტიური ნაცმოძრაობაში" 4 პარტია: ნაციონალურ მოძრაობას, ძლიერ საქართველოს, კოალიციას ცვლილებისთვის და გახარია საქართველოსთვის. ცესკოს მონაცემებით, სწორედ ამ 4-მა პარტიამ გადალახა 5%-იანი ბარიერი.

მმართველი პარტიის ლიდერების განცხადებები

მმართველი პარტიის ლიდერების განცხადებები