რამდენიმე ევროპარლამენტარი, ძირითადად ევროპის სახალხო პარტიის წევრები, რუსეთის დაზვერვის სამსახურის მაღალჩინოსნებისთვის დაწესებული სანქციების მოხსნას ითხოვს.

წერილში, რომელიც დღეს, 13 ივნისს, ბრიტანულ Independent-ში გამოქვეყნდა, პარლამენტარები ფსბ-ს დირექტორის, ალექსანდრ ბორტნიკოვისა და საგარეო დაზვერვის სამსახურის უფროსის, მიხეილ ფრადკოვისთვის ევროკავშირის ტერიტორიაზე შესვლის აკრძალვის მოხსნას ითხოვენ.

ევროპარლამენტარების თქმით, აღნიშნული პირების ევროპული სივრციდან მოკვეთა ტერორიზმის საფრთხეს ზრდის.

"გავიხსენოთ როგორ მოიქცა ამერიკა. მათ, ძირითადად, ეკონომიკური სანქციები დააწესეს, მაგრამ ისე შორს არ წასულან, რომ დაზვერვის მაღალჩინოსნებთან თანამშრომლობაზე უარი ეთქვათ და ამით საკუთარი უსაფრთხოება დაეყენებინათ ეჭვქვეშ. ჩვენ რატომ ვიქცევით ასე?" -ვკითხულობთ წერილში.

მათი თქმით, რუს მაღალჩინოსნებზე ვიზების გაცემა გამოიწვევს პირდაპირი დიალოგის აღდგენას და ტერორიზმის წინააღმდეგ თანამშრომლობას.

"რატომ ვამბობთ, რომ თითქოს ეს სანქციები ჩვენს ინტერესებში შედის, მაშინ როცა ვიცით, რა შედეგი შეიძლება მოჰყვეს ინფორმაციული თანამშრომლობის შეწყვეტასა და შეფერხებას? პარიზსა და ბრიუსელში მომხდარმა ტერორისტულმა აქტებმა შეგვახსენა, რომ ძალოვანთა თანამშრომლობა თვით ევროკავშირის ქვეყნებს შორისაც კი არ არის ოპტიმალური. თუ ჩვენ გავაგრძელებთ რუსეთთან ამ კუთხით თანამშრომლობის შესუსტებას, ჩვენს მოქალაქეებს საფრთხის ქვეშ დავაყენებთ", - წერენ პარლამენტარები.

პარლამენტარების აზრით, თუ ისრაელი თანამშრომლობს რუსეთთან, მიუხედავად მოსკოვისა და თეირანის ახლო კონტაქტებისა, იგივე უნდა გააკეთოს ევროპამ. მათი თქმით, სანქციები შეიძლება იმ სფეროებზე დაწესდეს, რომელიც რუსეთს ავნებს, მაგრამ არა ევროპულ ინტერესებს.

როგორც წერილში წერია, საჭიროა სანქციებისა და რუსეთთან თანამშრომლობის პოლიტიკის გადახედვა.