გუშინ მსოფლიოს ყველაზე მნიშვნელოვანი საპრეზიდენტო არჩევნების შედეგები გახდა ცნობილი — ამერიკის 47-ე პრეზიდენტი დონალდ ტრამპი გახდა.

ტრამპის სოციალურ-პოლიტიკურ პოზიციას ჰოლივუდში რომ ბევრი თანამოაზრე არ ჰყავს, ეს ახალი ამბავი არაა. ტრადიციულად, მსახიობებისა და მომღერლების უდიდესი ნაწილი დემოკრატიულ პარტიას უჭერს მხარს. არც წლევანდელი წელი ყოფილა გამონაკლისი — ამერიკის ვიცე-პრეზიდენტს, კამალა ჰარისს, საპრეზიდენტო არჩევნებში ბევრმა ცნობილმა სახემ დაუჭირა მხარი და ფანებს ხმის მისთვის მიცემისკენ მოუწოდა. მათ შორის იყვნენ ტეილორ სვიფტი, ბიონსე, ბილი აილიში და ა.შ.

მიუხედავად მათი მოწოდებებისა, დემოკრატიული პარტიის კანდიდატმა საპრეზიდენტო არჩევნებში გამარჯვება ვერ მოიპოვა. დონალდ ტრამპის პრეზიდენტობა ქვეყანაში ბევრი ცვლილების გამოწვევას გულისხმობს — იზღუდება ქალთა რეპროდუქციული უფლებები, ტრამპის დაპირების მიხედვით, ყველა შტატში აიკრძალება აბორტი, ა.შ. ამ ცვლილებებს სელებრითები სხვადასხვა სახით გამოეხმაურნენ:

"ეს ომია ქალთა წინააღმდეგ," — დაწერა ინსტაგრამზე ბილი აილიშმა, რომელიც, მისი სიტყვებით, ჰარისს მხარს სწორედ იმის გამო უჭერდა, რადგან ის რეპროდუქციული თავისუფლებისთვის, დემოკრატიისა და პლანეტისთვის იბრძვის.

აშკარად იმავეს ფიქრობს ჰეილი ბიბერიც. მან ინსტაგრამის "სთორიში" პოსტი გააზიარა, სადაც ვკითხულობთ, რომ "ქალის ნაცვლად მსჯავრდადებული დამნაშავის მხარდაჭერა სრული სიგიჟეა". "მხოლოდ ამის თქმა შემიძლია," — დაამატა ბიბერმა.

საპრეზიდენტო შედეგებით უკმაყოფილო იყო რეპერი ქარდი ბიც. "აი, სწორედ ამიტომ გატყდებათ თავს ქარიშხლები" — მიმართა ქარდიმ ფლორიდის, ლუიზიანას, ტეხასისა და ჩრდილოეთ კაროლინას შტატების მოსახლეობას, სადაც ტრამპმა გაიმარჯვა.

ცნობილმა პოდკასტის ავტორმა და UFC-ს წამყვანმა, ჯო როგანმა ერთი თვის წინ ტრამპს მხარდაჭერა გამოუცხადა. არჩევნების შედეგებს როგანი პირდაპირი ტრანსლაციით უყურებდა და ტრამპის გაპრეზიდენტებას ყიჟინით შეხვდა:

ღამის შოუს ცნობილმა წამყვანმა, ჯიმი კიმელმა, ემოციურ მონოლოგში გულწრფელად ისაუბრა თავის პოზიციასა და ამერიკის მომავალზე:

"გუშინ საშინელი ღამე იყო ქალებისთვის, ბავშვებისთვის, ასობით ათასი შრომისმოყვარე ემიგრანტისთვის, რომლებიც ამ ქვეყანას ამოძრავებენ, ჯანდაცვისთვის, ჩვენი კლიმატისთვის, მეცნიერებისთვის, ჟურნალისტიკისთვის, სამართლისთვის, სიტყვის თავისუფლებისთვის. საშინელი ღამე იყო ღარიბებისთვის, საშუალო ფენისთვის, მოხუცებისთვის, რომლებიც სოციალურ დაცვაზე არიან დამოკიდებულები, ჩვენი უკრაინელი მოკავშირეებისთვის, NATO-სთვის. სიმართლისთვის, დემოკრატიისთვის, წესიერებისთვის. თუმცა, ძალიან კარგი ღამე იყო პუტინისთვის."

საერთო ჯამში, ჰოლივუდი ტრამპის გამარჯვებას სკეპტიკურად და ნეგატიურად შეხვდა. არსებობენ გამონაკლისებიც, თუმცა ზოგადი სურათი სახეზეა — ცნობილ სახეებს რესპუბლიკელი, კონსერვატორი პრეზიდენტი არ სურთ.