ირანის გერმანიაში მდებარე სამივე საკონსულო დაიხურება — ამის მიზეზი გერმანიის მოქალაქე ირანელი პროგრამისტის, ჯამშიდ შარმაჰდის სიკვდილით დასჯაა.

"ჩვენ არაერთხელ ნათლად აღვნიშნეთ, რომ გერმანიის მოქალაქის სიკვდილით დასჯას სერიოზული შედეგები მოჰყვება. შესაბამისად, გადავწყვიტე, ირანის ფრანკფურტში, მიუნხენსა და ჰამბურგში მდებარე საკონსულოები დავხურო", — განაცხადა გერმანიის საგარეო საქმეთა მინისტრმა, ანალენა ბერბოკმა

ბერბოკმმა დაამატა ისიც, რომ ირანისა და გერმანიის ურთიერთობები უდაბლეს წერტილზე დაბლა ჩავიდა. გერმანიისა და ირანის ორმაგი მოქალაქე, ჯამშიდ შარმაჰდი, რომელსაც ირანი ტერორიზმის ორგანიზებას ედავებოდა, სიკვდილით 28 ოქტომბერს დასაჯეს.

ირანმა გერმანიის ქმედებას "უსამართლო" უწოდა და გერმანიის ელჩის მოვალეობის შემსრულებელი კონსულტაციებისთვის დაიბარა.

69 წლის შარმაჰდი, ირანის მტკიცებით, მონარქისტული ჯგუფის წევრი იყო, რომელიც 2008 წლის ტერორისტული თავდასხმების მიღმა იდგა — ტერაქტებს 14 ადამიანი ემსხვერპლა.