სადამკვირვებლო მისია ჩემი ხმა, საქართველოს ახალგაზრდა იურისტთა ასოციაცია და სამართლიანი არჩევნების და დემოკრატიის საერთაშორისო საზოგადოება, საქართველოში მოქმედ დიპლომატიური კორპუსის წარმომადგენლებს შეხვდნენ და ერთობლივი პრეზენტაცია წარუდგინეს. ამის შესახებ ინფორმაციას სადამკვირვებლო მისია ჩემი ხმა ავრცელებს.

შეხვედრაზე საუბარი 2024 წლის საპარლამენტო არჩევნების შედეგად გამოვლენილ დარღვევებსა და სავარაუდო გაყალბების სქემას შეეხო.

"სადამკვირვებლო მისიებმა დიპლომატებს გააცნეს არჩევნების დღეს თითოეული მისიის მიერ გამოვლენილი დარღვევები, სხვადასხვა კატეგორიების მიხედვით, ასევე ინფორმაცია მათ მიერ არჩევნების დღეს და შემდეგ პერიოდში საარჩევნო კომისიებში წარდგენილი საჩივრების შესახებ.პრეზენტაცია მოიცავდა ფოტო და ვიდეო მტკიცებულებებს. სადამკვირვებლო ორგანიზაციის წევრებმა ასევე პასუხი გასცეს დიპლომატიური კორპუსის წევრების მიერ დასმულ შეკითხვებს გამოვლენილი დარღვევებისა და განხილული საჩივრების შესახებ. შეხვედრაზე გამოიკვეთა საერთაშორისო პარტნიორების მაღალი ინტერესი და მათ გამოთქვეს მზადყოფნა, ყურადღებით დააკვირდნენ საქართველოში მიმდინარე პროცესს", — წერია განცხადებაში.