თუ ევროპა და აშშ არ აღიარებენ არჩევნებს, განმეორდება ის, რაც ბელარუსის შემთხვევაში მოხდა, ეს კი ნიშნავს იზოლაციას, ცივილიზებულ სამყაროს მოვწყდებით, — ამის შესახებ პარლამენტის ყოფილმა პირველმა ვიცე-სპიკერმა თამარ ჩუგოშვილმა პალიტრანიუსზე განაცხადა.

"შიდა და საერთაშორისო დამკვირვებლების შეფასებაზეა დამოკიდებული როგორ შეაფასებს ევროკავშირი და ამერიკა საქართველოს არჩევნებს. თუკი არჩევნები არალეგიტიმურად ჩაითვლება, რა ხდება შემდგომ? - შეიძლება ბელორუსს გადავხედოთ, თუ რა მოხდა ამ შემთხვევაში. ბელორუსიის არჩევნები არ აღიარა საერთაშორისო საზოგადოებამ, არ მიიჩნია ლეგიტიმურად და მათ ხელისუფლებასთან ყველანაირი კავშირი გაწყვიტა. ჩვენ შემთხვევაშიც, თუკი ევროპა და აშშ არ აღიარებენ და იტყვიან, ამ არჩევნებმა არ გამოხტა ქართველი ხალხის ნება, შესაბამისად, შემდგომ განმეორდება ის, რაც სხვა ქვეყნების შემთხვევაში მოხდა, რაც იმას ნიშნავს, რომ საქართველოს ხელისუფლებასთან ურთიერთობას გაწყვეტენ, ეს კი ნიშნავს იზოლაციას. თვეების წინ ქართულ ოცნებას ვეუბნებოდით, რომ ნუ მიიღებთ რუსულ კანონს, რადგან ეს არის გზა იზოლაციისკენ. ევროინტეგრაციას გავაგრძელებთ კი არა, იზოლაციაში მოვექცევით, რაც ნიშნავს რომ ცივილიზებულ სამყაროს სრულად მოვწყდებით.

თუკი ხელისუფლებამ არ აღიარა, რომ მასიურად და მასშტაბურად ჩაატარა მანიპულაციები, ზოგიერთ შემთხვევაში სისხლის სამართლის დანაშაულები ჩაიდინა, ქართველ ხალხს არ მისცა ნება თავისუფლად გამოეხატა თავისი არჩევანი, მაშინ მთელი ქვეყანა ვემსხვერპლებით", — განაცხადა ჩუგოშვილმა.