1. 1984 წელს ინდირა განდი მოკლეს

1984 წლის 31 ოქტომბერს ინდირა განდი, რომელიც 15 წელზე მეტი ხნის განმავლობაში ინდოეთის პრემიერ მინისტრი იყო, მისმა დაცვის ორმა თანამშრომელმა მოკლა. ინტერვიუს მისაცემად მიმავალ ინდირას საკუთარმა დაცვის თანამშრომლებმა ცეცხლი გაუხსნეს. მინისტრი ადგილზე გარდაიცვალა. დამნაშავეებიდან ერთ-ერთი სასაზღვრო პოლიციამ გაქცევისას მოკლა, ხოლო მეორე გაასამართლეს და სიკვდილით დასაჯეს. ინდოელი საზოგადოების ნაწილი თვლის, რომ ინდირა ინდოეთის დედა და გადამრჩენელი იყო, ნაწილი მას ავტორიტარულ მმართველად მიიჩნევს. თუმცა, საყოველთაოდაა აღიარებული, რომ მისმა ხელმძღვანელობამ ჩამოაყალიბა ინდოეთი და მისი სამომავლო კურსი განსაზღვრა.

2. 1918 წელს ესპანური გრიპის პანდემიის ყველაზე მომაკვდინებელი თვე დასრულდა

1918 წელს მსოფლიო მასშტაბით 50 მილიონამდე ადამიანი დაიღუპა ესპანური გრიპის სახელით ცნობილი პანდემიის დროს. ესპანური გრიპი კაცობრიობის ისტორიაში ერთ-ერთი ყველაზე დამანგრეველ ვირუსადაა მოხსენიებული. შეერთებულ შტატებში, სადაც დაახლოებით 675 000 ამერიკელი დაიღუპა, არც ერთი თვე არ ყოფილა უფრო მომაკვდინებელი, ვიდრე 1918 წლის ოქტომბერი. არავინ იცის ზუსტად რის გამო მოხდა ოქტომბრის თვეში დაღუპულთა რიცხვის ზრდა, თუმცა მათი რაოდენობა დაახლოებით 200 000 ადამიანი იყო. 2009 წელს ჩატარებულმა კვლევამ აჩვენა, რომ შესაძლოა სიკვდილიანობის მაღალი მაჩვენებელი გრიპის სამკურნალოდ მიღებულმა ვაქცინის არასწორმა დოზამაც გამოიწვია.

3. 1922 წელს მუსოლინიმ ფაშისტური პარტიის გამარჯვება აღნიშნა

1922 წელს ბენიტო მუსოლინიმ იტალიაში პოლიტიკური აჯანყება წამოიწყო, რომლის კულმინაციაც რომში გამართული აღლუმი იყო. მუსოლინიმ და მისმა 20 000-მა მომხრემ რომში, ძალაუფლების ხელში ჩაგდების აღსანიშნავად, მარში გამართეს. 29 ოქტომბერს მეფე ვიქტორ ემანუელ მესამემ 39 წლის ბენიტო მთავრობის ჩამოსაყალიბებლად რომში დაიბარა. კოალიციური მთავრობის მეთაურად უფლებამოსილმა მუსოლინიმ დაიწყო თავისი ძალაუფლების დემონსტრაცია და საკუთარ წარმატებაზე მითების შექმნა. 31 ოქტომბერს ფაშისტური პარტიის მზარდი ძალის საჩვენებლად ახლად დანიშნულმა პრემიერმა რომის ქუჩებში შავი მაისურების აღლუმი გამართა.

4. 1926 წელს ჰარი ჰუდინი გარდაიცვალა

1926 წლის ოქტომბრის ბოლოს ჰარი ჰუდინი მონრეალში მაკგილის უნივერსიტეტს ეწვია და თაღლითური სპირიტუალიზმის შესახებ სტუდენტებისა და პროფესორ-მასწავლებლებისთვის ლექცია წაიკითხა. პარასკევს, 22 ოქტომბერს, ჰუდინმა მაკგილის რამოდენიმე სტუდენტი თავისთან, Princess Theater-ის გასახდელში, მიიწვია. იმაზე, თუ რა მოხდა სხვადასხვა ვერსიები არსებობს. რაც დანამდვილებით ვიცით ისაა, რომ სტუდენტმა, სახელად ჯოზელინ გორდონ უაითჰედმა, სახელგანთქმულ ილუზიონისტს სხეულზე მძიმე დაზიანებები მიაყენა. ერთი კვირის შემდეგ, 31 ოქტომბერს, 52 წლის ჰუდინი გარდაიცვალა. გარდაცვალების ოფიციალურ მიზეზად დიფუზური პერიტონიტი დასახელდა. ესაა მუცლის ღრუს ინფექცია, რომელიც აპენდიქსის გახეთქვითაა გამოწვეული.

5. 1941 წელს გერმანულმა წყალქვეშა ნავმა ამერიკული საზღვაო ხომალდი, რუბენ ჯეიმსი, ჩაძირა

მეორე მსოფლიო ომის დაწყების შემდეგ USS Reuben James ატლანტის ოკეანეში იდგა. მისი დანიშნულება იყო ტვირთის მომარაგების პროცესში გემები თავდასხმისგან დაეცვა. 22 წლის სამხედრო ხომალდი შვიდ ზღვაში ცურავდა, მაგრამ ძირითადად სამშვიდობო პატრულირება და დაბალ რისკიანი ოპერაციების შესრულება ევალებოდა. 1941 წლის 31 ოქტომბერს, პერლ-ჰარბორის თავდასხმამდე და ამერიკის ოფიციალურად მეორე მსოფლიო ომში ჩართვამდე, სულ რაღაც, ერთი თვით ადრე, რუბენ ჯეიმსი გახდა აშშ-ს საზღვაო ძალების პირველი გემი, რომელიც კონფლიქტის დროს ჩაიძირა. ბორტზე მყოფი ეკიპაჟის თითქმის 150 წევრიდან მხოლოდ 44 გადარჩა.