"ყველას მსგავსად, მეც გარკვევის პროცესში ვარ" — შონ მენდესი თავის სექსუალობაზე

პოპულარობის ერთ-ერთი ცუდი მხარე ისაა, რომ უცხო ადამიანები შენს პირად სივრცეში უბოდიშოდ იჭრებიან და ირიბად, ზოგჯერ პირდაპირაც, გაიძულებენ, ამა თუ იმ პირადულ საკითხზე საჯაროდ ისაუბრო. ცნობილი ადამიანების სექსუალობაც ხშირადაა ხოლმე განხილვის თემა, მათ შორის, მედიაში, რაც ვარსკვლავებს უბიძგებს, თავიანთი ნების საწინააღმდეგოდ ილაპარაკონ იდენტობაზე. ასეთი დისკუსია შონ მენდესის გარშემოც არ ცხრება, ამიტომ, კანადელმა მომღერალმა ცოტა ხნის წინ გადაწყვიტა, თავის მსმენელთან ღიად ესაუბრა.

ერთ-ერთ უახლეს კონცერტზე მენდესმა თავისი ახალი სიმღერა, The Mountain, შეასრულა, რომლის ტექსტიც მომღერლის სექსუალობას შეეხება.

"ზოგჯერ აზრს ვიცვლი, შენ კი შეგიძლია ის თქვა, რაც გინდა. შეგიძლია თქვა, რომ ძალიან ახალგაზრდა ვარ, შეგიძლია თქვა, რომ მეტისმეტად ხნიერი ვარ. შეგიძლია თქვა, რომ გოგოები ან ბიჭები მომწონს. როგორც შენ გაგიხარდება", — ამბობს მენდესი სიმღერაში.

ამ კომპოზიციის მნიშვნელობა პოპვარსკვლავმა კონცერტზე თავადვე ახსნა და აღნიშნა, რომ იდენტობის ძიების პროცესშია.

"ძალიან ადრეული ასაკიდან გამუდმებით მესმოდა ჩემს სექსუალობაზე ლაპარაკი", — განაცხადა მენდესმა, — "მე კი ეს უაზრობად მიმაჩნია, რადგან, ვფიქრობ, რომ სექსუალობა საოცრად კომპლექსური რაღაცაა და რთულია, ის ჩარჩოებში მოაქციო. [ამ დისკუსიას] ჩემთვის ძალიან პირადულ საკითხში შემოჭრად ვთვლიდი ყოველთვის. იმ საკითხში, რომელსაც თავადვე ვარკვევდი, რომელიც ჯერ კიდევ მისაკვლევი მქონდა და ისევ მაქვს".

@lewisiana Shawn finally addressing his sexuality! #shawnmendes #friendsandfamily #redrock ♬ original sound - Andrew Lewis

მუსიკოსმა დასძინა, რომ ამ თემას ახლა "ყველასთან უფრო დასაახლოებლად" შეეხო.

"სიმართლე ისაა, რომ ყველას მსგავსად, მეც გარკვევის პროცესში ვარ", — განაგრძო მენდესმა, — "ზოგჯერ ვიცი, ზოგჯერ — არა. ეს კი ძალიან მაშინებს, რადგან ჩვენს საზოგადოებაში ამას დიდ მნიშვნელობას ანიჭებენ. ვცდილობ, სიმამაცე გამოვიჩინო და საკუთარ თავს ადამიანად ყოფნის, ყველაფრის განცდის ნება დავრთო. ახლა მხოლოდ ამის თქმა მსურს".

გავრცელებული ხმების საპასუხოდ მენდესი თავის იდენტობას აქამდეც შეხებია. 15 წლის ასაკიდან ყველა გეის მეძახდაო, აღნიშნა მუსიკოსმა 2020 წლის ინტერვიუში.

"ეს ძალიან გამაღიზიანებელი იყო, რადგან ჩემთვის ახლობელი არაერთი ადამიანიც ყოფილა გეი და ამას მალავდა. სწორედ მათ გამო მომერეოდა ხოლმე ბრაზი. მინდოდა, მეთქვა, გეი არ ვარ, მაგრამ რომც ვიყო, მერე რა-მეთქი. რთულია, ასეთ სიტუაციაში სათანადო პასუხი იპოვო", — თქვა პოპვარსკვლავმა მაშინ.