იუსტიციის სამინისტროს ინფორმაციით, იუსტიციის სახლში ქართული სამართლის ჰოლოგრამული მუზეუმი გაიხსნა. პროექტში ჩართულები იყვნენ სისტემაში სტაჟირების სამთავრობო პროგრამის ფარგლებში დასაქმებული ახალგაზრდებიც.

სამინისტროს თქმით მუზეუმს ორი მნიშვნელოვანი ფაქტორის ერთობლიობა განაპირობებს: "პირველი, რომელიც დამთვალიერებელს ქართული სამართლის განვითარების მრავალსაუკუნოვან ისტორიას აცნობს, ხოლო მეორე ექსპოზიცია ჰოლოგრამული, ციფრული ფორმატის გამოსახულებებით არის წარმოდგენილი, რაც, აგრეთვე, სიახლეს წარმოადგენს".

"მუზეუმში ქრონოლოგიურად არის წარმოდგენილი ქართული სამართლის განვითარების ძირითადი ეტაპები; ისტორიული ფიგურები, რომლებმაც განსაკუთრებული წვლილი შეიტანეს ამ საქმეში; უძველესი სამართლის ძეგლები, საგანმანათლებლო კერები, ყველაფერი ის, რაც წარმოაჩენს ქვეყნის სამართლებრივი კულტურის უნიკალურ ბუნებას", — წერია უწყების მიერ გავრცელებულ ინფორმაციაში.

მუზეუმი დამთვალიერებლებს ქვეყნის ისტორიისა და კულტურის შესახებ "მდიდარ და მრავალფეროვან" ინფორმაციას მიაწვდის.