რუსეთის ფედერაციის საბჭოს საერთაშორისო საქმეთა კომიტეტის თავმჯდომარე, გრიგორი კარასინი ტელეგრამზე წერს, რომ საქართველოში ევროკავშირის ელჩმა "გააოცა თავისი უხეშობითა და პირდაპირობით". ინფორმაციას ეხო კავკაზა ავრცელებს.

"ვიღაც ხერჩინსკი, ევროკავშირის ელჩი საქართველოში, ეროვნებით პოლონელი, თბილისში გამძვინვარდა.

ითქვა, რომ საქართველო არ იქნება ევროკავშირის წევრი არც დღეს, არც ხვალ და არც 2030 წელს, თუ ქვეყანაში ერთპარტიული მმართველობის სისტემა ჩამოყალიბდება. შეგახსენებთ, რომ ეს ითქვა საქართველოს პარლამენტის არჩევნების წინ, ქვეყანაში დაძაბული პოლიტიკური ბრძოლის ატმოსფეროში. იმის თქმა, რომ ეს დიპლომატიური ეთიკის დარღვევაა, არაფერია! რეალურად ხდება დამოუკიდებელი ქვეყნის მოქალაქეების პირდაპირი შანტაჟი და დაშინება. მსგავსი რამის მოთმენა სერიოზული გამოცდაა ქართული სიამაყისთვის.

დარწმუნებული ვარ, ამას ბრიუსელმაც უნდა მიაქციოს ყურადღება. თუმცა, მათ უკვე დაივიწყეს წესები", — წერს კარასინი ტელეგრამში.

შეგახსენებთ, რომ საქართველოში ევროკავშირის ელჩმა, პაველ ჰერჩინსკიმ განაცხადა:

"თუ თქვენ გადაწყვეტთ საქართველოს გადაქცევას ერთპარტიულ სახელმწიფოდ, აკრძალავთ ოპოზიციას და განდევნით სამოქალაქო საზოგადოებას, თუ აქცევთ საქართველოს ადგილად, სადაც თავისუფალი და დამოუკიდებელი მედიის ადგილი არ იქნება,ა თუ გადაწყვიტეთ, რომ საქართველოში არ იქნება დაცული ყველა ადამიანის უფლება, ღიად ვიტყვი: ქვეყანა არ გახდება ევროკავშირის წევრი არც დღეს, არც ხვალ და არც 2030 წელს".