"მე ვიმღერებ [კონცერტზე]" – ასე უპასუხა თბილისის მერმა, კახა კალაძემ 20 ოქტომბერს თბილისის მერიის მიერ დაგეგმილ კონცერტთან დაკავშირებით ჟურნალისტების დასმულ შეკითხვას, "მგზავრების" უარის შემდეგ, ვინ იმღერებს მერიის ორგანიზებულ ღონისძიებაზე?

„გულწრფელად შევდივარ „მგზავრების“ მდგომარეობაში. იმ წნეხში, ზეწოლასა და ბულინგში, სადაც ისინი იმყოფებიან, შეიძლება ბევრი ჩვენი თანამოქალაქეც იყოს. 26 ოქტომბერს ყველას გავათავისუფლებთ“, — განაცხადა კახა კალაძემ მედიასთან.

20 ოქტომბერს, ზღვისუბნის პარკის გახსნის ღონისძიება გაიმართება, რომელზეც ჯგუფი "მგზავრების" კონცერტი უნდა გამართულიყო, თუმცა, მათ უარი განაცხადეს. კახა კალაძის თქმით, აღნიშნული გადაწყვეტილება არის ძალიან ცუდი და ეს პირველ რიგში, ჯგუფის წევრებს დააზიანებს.

"საქართველოს მომავალი, რა თქმა უნდა, არის ევროპა. თუ რაიმე წარმატებას მივაღწიეთ ევროინტეგრაციის გზაზე, ეს ქართული ოცნების პირობებში მოხდა. შესაბამისად, განცხადებები რომ "საქართველოს გზა ევროპაშია" არის ფარისევლური.

რაც შეეხება ამ კონკრეტულ გადაწყვეტილებას, რბილად რომ, ვთქვათ ძალიან ცუდი იყო. ჩვენ ამით არაფერი დაგვიშავდება, არც პარკის გახსნაზე მოსულ ადამიანებს. პირველ რიგში, ეს საზიანო მათთვის არის, რადგან ყველა შეურაცხყოფას აყენებს თავიანთი ქმედებებიდან გამომდინარე. სადაც არ უნდა იყო და როგორც არ უნდა იყო, ღირსება არ უნდა დაკარგო. ყოველ კვირას რუსეთში რომ დადიხარ და "რუბლებს" იღებ, რა ევროპაზე და ევროპულ მომავალზე გველაპარაკები? მათ ერთი სიტყვა არ უხსენებიათ ოკუპაციასთან დაკავშირებით. ეს რომ ახსენონ, რუსეთში აღარ შეუშვებენ", — აღნიშნა თბილისის მერმა.

კონცერტი გაუქმების შესახებ ჯგუფმა ინფორმაციას Facebook გვერდზე გაავრცელა.

"მივმართავთ ჩვენს გულშემატკივარს, კონცერტი გაუქმებულია. საქართველოს მომავალი ევროპაშია", — ნათქვამია ინფორმაციაში.

გვიან ღამეს კი სოციალურ ქსელში თბილისის მერიის განცხადება გამოჩნდა, სადაც ნათქვამია, რომ "მგზავრებმა" ვერ გაუძლო იმ ბულინგს, რაც ლიბერალური ფაშიზმის წარმომადგენლებმა მათ წინააღმდეგ მოაწყვეს.

მერიას მალევე უპასუხა "მგზავრების" საზოგადოებასთან ურთიერთობის მენეჯერმა ნინი დედალამაზიშვილმა: "ლიბერალური ფაშიზმი არ არსებობს. არსებობს სწორი და არასწორი. ჩვენი მომავალი ევროპაშია და ვერანაირი გლობალური ომის პარტიის შიშით ამ სულისკვეთებას ვერ შეაჩერებთ", – დაწერა ნინი დედალამაზიშვილმა Facebook-ზე.