17-18 ოქტომბერს, ბრიუსელში, ევროკავშირის ლიდერები შეიკრიბებიან და სხვა საკითხებთან ერთად, საქართველოზეც ისაუბრებენ, — ამის შესახებ ევროპული საბჭოს პრეზიდენტმა, შარლ მიშელმა განაცხადა.

"ევროპული საბჭო განიხილავს ჩვენს საერთაშორისო ურთიერთობასთან დაკავშირებულ რამდენიმე საკითხს, მათ შორის მოლდოვასა და საქართველოში არსებულ ვითარებას. ორივე ქვეყანა თავიანთი ევროპული გზისთვის გადამწყვეტი მომენტის წინაშე დგას", — აღნიშნულია შარლ მიშელის მოსაწვევ წერილში, რომელიც მან ევროპული საბჭოს წევრებს გაუგზავნა.

14 ოქტომბერს Reuters-მა გაავრცელა ინფორმაცია, რომ ევროკავშირის ლიდერები გეგმავენ, გააფრთხილონ საქართველო, რომ მისი მთავრობა ქვეყნის EU-სკენ გზას საფრთხეს უქმნის, — ამის შესახებ 17-18 ოქტომბერს ბრიუსელში დაგეგმილი ევროპული საბჭოს სამიტის დასკვნის პროექტშია საუბარი.

სააგენტოს ცნობით, დოკუმენტში აღნიშნულია, რომ "ევროკავშირი კიდევ ერთხელ ადასტურებს მზადყოფნას, რომ ევროპულ გზაზე ქართველ ხალხს მხარი დაუჭიროს, მაგრამ ასევე გამოხატავს სერიოზულ შეშფოთებას საქართველოს ხელისუფლების მიერ განხორციელებული ქმედებების გამო. ევროპული საბჭო აღნიშნავს, რომ მსგავსი ქმედებები საქართველოს ევროკავშირისკენ გზას საფრთხეს უქმნის და გაწევრიანების პროცესს დე ფაქტო აჩერებს".