გასულ კვირას, 53 წლის ჰან განი პირველი სამხრეთკორეელი მწერალი და პირველი აზიელი ქალი გახდა, რომელმაც ლიტერატურის დარგში ნობელის პრემია მიიღო. განს ჯილდო გადაეცა "ექსპრესიული პოეტური პროზისთვის, რომელიც თვალს უსწორებს ისტორიულ ტრავმებს და ააშკარავებს ადამიანური ცხოვრების სიმყიფეს".

მიუხედავად ამ დიდი წარმატებისა, პარასკევს ცნობილი გახდა, რომ მწერალი ტიპურ პრესკონფერენციას არ გამართავს და ნობელის მიღებას სახალხოდ არ აღნიშნავს. როგორც ამბობენ, ეს მწერლის არჩევანია და მსოფლიოში მიმდინარე მოვლენებს უკავშირდება, შეიძლება ამას პოლიტიკური პროტესტიც კი ვუწოდოთ.

ჰან განის ამ გადაწყვეტილების შესახებ ისაუბრა თავისმა მამამ, მწერალმა ჰან სეუნგ-ვონმა:

"მან თქვა, რომ რუსეთ-უკრაინისა და ისრაელ-პალესტინის ომების ფონზე, ყოველდღე მოდის ცნობები დაღუპულთა შესახებ, სწორედ ამიტომ საზეიმო პრესკონფერენცია არ გაიმართება, იმედია, ამ გადაწყვეტილებას სწორად მიიღებთ და გამიგებთ."

მიუხედავად იმისა, რომ ნობელის მიღების შემდეგ ჰან განის წიგნების გაყიდვების მაჩვენებელი ყოველდღიურად იზრდება და კორეა ავტორის სახელით ზეიმობს ამ გამარჯვებას, განი საჯარო კომენტარისგან ამ დრომდე თავს იკავებს.