სოციალური სამართლიანობის ცენტრი აზერბაიჯანელი ჟურნალისტის აფგან სადიგოვის საერთაშორისო დაცვაზე საემიგრაციო დეპარტამენტის უარს სასამართლოში ასაჩივრებს. სოციალური სამართლიანობის ცენტრის ხელმძღვანელის თამთა მიქელაძის განცხადებით, შინაგან საქმეთა სამინისტროს საიმიგრაციო დეპარტამენტის უარი უკანონო და დაუსაბუთებელია. ორგანიზაცია აზერბაიჯანელი ჟურნალისტის აფგან სადიგოვის ინტერესებს იცავს.

მიქელაძე მოუწოდებს სასამართლოს მიანიჭოს ჟურნალისტს საერთაშორისო დაცვა და თავი შეიკავოს მისი აზერბაიჯანში ექსტრადირებისგან, სადაც, მისი თქმით, ჟურნალისტს პოლიტიკური დევნა ემუქრება.

"იმ პირობებში, როდესაც არსებობს დასაბუთებული რისკები, რომ აზერბაიჯანში აფგან სადიგოვი წამების, არაადამიანური მოპყრობის, დასჯის და პოლიტიკური დევნის მსხვერპლი გახდება, საქართველოს სახელმწიფოს მიერ მისთვის საერთაშორისო დაცვის მინიჭებაზე უარის თქმა და აზერბაიჯანში ექსტრადირება არსებით წინააღმდეგობაში მოდის საქართველოს მიერ საერთაშორისო ხელშეკრულებებითა და შეთანხმებებით ნაკისრ ვალდებულებებთან. ამასთან უგულებელყოფს დემოკრატიისა და სამართლებრივი სახელმწიფოს ფუნდამენტურ პრინციპებს" — აცხადებს თამთა მიქელაძე.

საექსტრადიციო პატიმრობაში მყოფი ჟურნალისტი აფგან სადიგოვი უკვე 26 დღეა პროტესტის ნიშნად შიმშილობს და მისი ჯანმრთელობის მდგომარეობა მძიმეა. რისკის წინაშე დგას მისი ოჯახიც: მეუღლე და მცირეწლოვანი შვილები, რომლებიც ამჟამად თბილისში ცხოვრობენ და რეგულარულად იღებენ მუქარის უმძიმეს გზავნილებს.

აფგან სადიგოვის მეუღლე სევინჩ სადიგოვა ამბობს, რომ მისი მცირეწლოვანი შვილები მოსალოდნელი საფრთხის პირობებში ვერ ახერხებენ სკოლაში სიარულს და ვერ იღებენ განათლებას.

სევინჩ სადიგოვა საქართველოს ხელისუფლებას ილჰამ ალიევის დაკვეთის შესრულებაში ადანაშაულებს და მისი მეუღლის ჯანმრთელობის მდგომარეობის გაუარესებაზე პასუხისმგებლობას მას აკისრებს.

"შიმშილობის მთავარი მიზეზია მის წინააღმდეგ მიღებული უსამართლო გადაწყვეტილება, ჩვენ გვინდა გადაწყვეტილებების მიღების დროს სასამართლოც და პასუხისმგებელი უწყებებიც დაეყრდნონ კანონს და ამ შემთხვევაში, დარწმუნებული ვარ, გადაწყვეტილება იქნება ჩემი მეუღლის სასარგებლოდ მიღებული და ის გათავისუფლდება. ჩვენ გვითვალთვალებენ, ჩემი შვილები ვერ იღებენ განათლებას. ჩემი მეუღლის დაკავება არის პირდაპირ აზერბაიჯანის ხელისუფლების და პრეზიდენტის ილჰამ ალიევის დაკვეთა საქართველოს ხელისუფლების მიმართ. საქართველოს ხელისუფლება და ის უწყებები, რომლებიც არიან ამ საკითხზე პასუხისმგებელი, გადაწყვეტილებების მიღების პროცესში ასრულებენ ილჰამ ალიევის სურვილს და მის ინტერესებს ემსახურებიან. მეც და ჩემი შვილებიც ვართ საფრთხის ქვეშ" — აცხადებს სადიგოვის მეუღლე.