კომუნიკაციების კომისიის თავმჯდომარე კახა ბექაური პარტია გახარია — საქართველოსთვის ერთ-ერთი ლიდერის ნათია მეზვრიშვილის ბრალდებებს ეხმიანება და აღნიშნავს, რომ გახარიას პარტია საზოგადოების შეცდომაში შეყვანას ცდილობს. ბექაურის განცხადებით, მის კომპანიას არც ერთი პირდაპირი სახელმწიფო შესყიდვა არ მიუღია არსებობის მანძილზე და არც სახელმწიფო ტენდერებში მიუღია არასდროს მონაწილეობა.

"არასდროს მიმიღია სახელმწიფოსგან შემოსავალი და რაც ჩემი ბიზნესსაქმიანობიდან გამაჩნია, ყველაფერი კანონიერი და ლეგალური გზით მაქვს მიღებული. ნათია მეზვრიშვილი ამბობს, რომ 73 მილიონი ლარის 211 სახელმწიფო შესყიდვა აქვს ჩემს კომპანიას მიღებული. ეს დიდი ტყუილი ემსახურება საზოგადოების შეცდომაში შეყვანას, რომ თითქოს ჩემი კომპანია და მე შემოსავლებს სახელმწიფო ბიუჯეტიდან ვიღებთ. 211 კი არა, ერთი სახელმწიფო შესყიდვა არ მიუღია ჩემს კომპანიას არსებობის მანძილზე, 73 მილიონი კი არა, ერთი თეთრი არ მიუღია სახელმწიფო შესყიდვების გზით ხაზინიდან. ნაციონალური მოძრაობის ყოფილ პროკურორს, ნათია მეზვრიშვილს, რომელიც ნაციონალური მოძრაობის ხელისუფლების სამაგალითო საჯარო მოხელეა, თვალი ისევ კანონიერი გზით მიღებული ქონების და ბიზნესის დაყაჩაღებაზე უჭირავს. ის ნაცმოძრაობის სტილში, ყალბი ინფორმაციის გავრცელებით ცდილობს საზოგადოებაში არასწორი აზრის ფორმირებას — თითქოს ბიუჯეტიდან იღებდა ჩემი კომპანია შემოსავლებს. ნაციონალური მოძრაობის ხელისუფლების პროკურორს კარგად აქვს ნასწავლი ლეგალური გზით მიღებული შემოსავლისა და ქონების დაყაჩაღების ხერხები. თუმცა, ამ ყველაფერს პოზიტიური მხარე აქვს — ხელს უწყობს საზოგადოების მხრიდან გახარიას პარტიაზე არჩევნების წინ საკუთარი აზრის ფორმირებას და ინფორმირებული არჩევანის გაკეთებას," — აცხადებს კახა ბექაური.

შეგახსენებთ, რომ ნათია მეზვრიშვილმა გუშინ გაავრცელა ინფორმაცია იმის შესახებ, რომ "კომუნიკაციების მარეგულირებელი კომისიის თავმჯდომარე, კახა ბექაური ბოლო ოთხი წლის განმავლობაში გამდიდრდა, მილიონერი გახდა და მას უნდა ამ ქონების დაცვა და კიდევ უფრო გამდიდრება".

მეზვრიშვილის თქმით, კახა ბექაური "ფლობს 40-მდე უძრავ ქონებას. მათ შორისაა ბინები, მიწის ნაკვეთები, დამხმარე ფართები. მათ საერთო ღირებულება შეადგენს 4 მლნ აშშ დოლარს. აქედან 3.5 მლნ ქონება 2021-2024 წლებში დააგროვა. კახა ბექაური გახლავთ ორი ნაბიჯის მოწილე, საიდანაც 41 მლნ ლარზე მეტი დივიდენდი აქვს მიღებული 2021-2023 წლებში. ამ კომპანიას სახელმწიფოსგან 73 მლნ ლარის 211 გამარტივებული შესყიდვა აქვს მიღებული. კახა ბექაური ფლობს 7 ავტომანქანას, რომელთა საერთო ღირებულება 2 მლნ ლარზე მეტია".