ბელარუსის ავტორიტარ პრეზიდენტს ალექსანდრე ლუკაშენკოს ოკუპირებულ აფხაზეთში 20 ჰექტარი ფართობის მიწა აჩუქეს. ამის შესახებ ბელარუსის გამოძიების ცენტრის გამომძიებელი ჟურნალისტები წერენ.

გამოძიებაში ყურადღება ბიჭვინთაში ლუკაშენკოს 2022 წლის სექტემბრის ვიზიტზეა გამახვილებული. მაშინ ალექსანდრე ლუკაშენკო ე.წ პრეზიდენტ ასლან ბჟანიას შეხვდა. ცოტა ხნით ადრე, ლუკაშენკომ განაცხადა, რომ აფხაზეთის აღიარება მინსკს ძალიან დიდ ზიანს მიაყენებდა, რომლის კომპენსირებისთვისაც მოსკოვი მზად არ იყო. მიუხედავად ამისა, ლუკაშენკო და ბჟანია თანამშრომლობის გაფართოებაზე შეთანხმდნენ.

ვიზიტის შემდეგ დღეს ოკუპირებული აფხაზეთის ე.წ პრემიერმა შპს "Zhemchuzhina 2010-ს" 20 ჰექტარი ფართობის მიწა გადასცა სანაპიროზე. ერთი თვის შემდეგ, სოხუმში გავრცელდა სიუჟეტი, რომელშიც ოჩამჩირის რაიონის სოფელ კინდღში მიწის გადაცემა საინვესტიციო პროექტით აიხსნა.

"ინვესტიციის ზომა 15მლრდ რუბლია (დაახლ. 260 მლნ დოლარი). აფხაზეთში დარეგისტრირებული შპს "Zhemchuzhina 2010-ის" 90% ბელარუსის მოქალაქეს ეკუთვნის, ხოლო 10% აფხაზეთისას", — ნათქვამია სიუჟეტში.

"Zhemchuzhina 2010"-ის 90% ბელარუსულ კომპანია "Termaliya-ს" ეკუთვნის, რომელიც ლუკაშენკოს ბიჭვინთაში ვიზიტამდე ორი თვით ადრე დარეგისტრირდა. კომპანიის დირექტორი არც მეტი, არც ნაკლები, ლუკაშენკოს დაცვის სამსახურის ყოფილი თანამშრომელია.

"მე წარმოდგენა არ მაქვს... როგორც ჩანს, ქაღალდები ჩემს სახელზეა გაფორმებული. მე არც კი ვიცი იქ რას აკეთებენ ან არ აკეთებენ", — განაცხადა დავით კვიცინიამ, რომელიც ოფიციალურად დარჩენილი 10%-ის მფლობელია.

გამოძიების ავტორები ირწმუნებიან, რომ "Zhemchuzhina 2010-ს" ფაქტობრივად ბელარუსის ყოფილი სახელმწიფო მოხელე, ლუკაშენკოს საქმეების მმართველი ვიქტორ შეიმანი და მისი ხალხი მართავენ. შეიმანი ესწრებოდა როგორც 2022 წელს ბჟანიასა და ლუკაშენკოს ოკუპირებულ აფხაზეთში შეხვედრას, ისე ბჟანიას საპასუხო ვიზიტსაც მინსკში 2023 წლის თებერვალში.