აშშ-ში ვიზიტით იმყოფება წმინდა ანდრია პირველწოდებულის სახელობის ქართული უნივერსიტეტის (სანგუ) დელეგაცია, რომელსაც ხელმძღვანელობს ბოდბელი მთავარეპისკოპოსი იაკობი, – ამის შესახებ ინფორმაციას წმ. ანდრიას ქართული უნივერსიტეტი ავრცელებს.

ვიზიტის ფარგლებში დელეგაცია მართავს შეხვედრებს ამერიკელ პარტნიორებთან და მხარდამჭერებთან, რაც მიზნად ისახავს საერთაშორისო თანამშრომლობის გაძლიერებას და არსებული პარტნიორობების გაღრმავებას.

სანგუ-ს მიერ გავრცელებულ ინფორმაციაში ნათქვამია, რომ "უნივერსიტეტმა მოიპოვა USAID-ის სამოქალაქო განათლების პროგრამა და 2024 წლიდან აქტიურად ჩაერთო "USAID-ის მომავლის განათლების პროგრამაში", რაც კიდევ უფრო აძლიერებს მის როლს განათლების და სამოქალაქო საზოგადოების განვითარების პროცესში".

"სანგუმ ჩრდილოეთ კენტუკის უნივერსიტეტთან Northern Kentucky University პარტნიორობით წარმატებით დანერგა ორმაგი სამაგისტრო პროგრამა კიბერუსაფრთხოებასა და ბიზნეს ინფორმატიკაში, რომელიც საქართველოში პირველია და დიდი წარმატებით სარგებლობს. პროგრამა უკვე მოიცავს 120 სტუდენტს და წარმოადგენს ერთ-ერთ პირდაპირ წარმატებულ მაგალითს IVLP პროგრამის ფარგლებში, აშშ-ის სახელმწიფო დეპარტამენტის მხარდაჭერით.

ამასთან, სანგუ აშშ-ის საერთაშორისო განვითარების სააგენტოს (USAID) პროგრამების პირდაპირი ბენეფიციარია. უნივერსიტეტმა მოიპოვა USAID-ის სამოქალაქო განათლების პროგრამა და 2024 წლიდან აქტიურად ჩაერთო "USAID-ის მომავლის განათლების პროგრამაში", რაც კიდევ უფრო აძლიერებს მის როლს განათლების და სამოქალაქო საზოგადოების განვითარების პროცესში.

სანგუ მადლობას უხდის ამერიკელ პარტნიორებს მრავალწლიანი მხარდაჭერისა და თანამშრომლობისთვის, რაც მნიშვნელოვნად უწყობს ხელს საქართველოს განათლების ხარისხის გაუმჯობესებას და ინოვაციურ პროექტების განვითარებას. განსაკუთრებული მადლობა აშშ-ის სახელმწიფო დეპარტამენტს და აშშ-ის საელჩოს თბილისში ამ მჭიდრო და სტრატეგიული პარტნიორობისთვის", — ნათქვამია სანგუ-ს მიერ გავრცელებულ ინფორმაციაში.

შეგახსენებთ, რომ 3 ოქტომბერს ცნობილი გახდა, რომ ევროპისა და ევრაზიის საკითხებში აშშ-ის სახელმწიფო მდივნის თანაშემწე, ჯიმ ო'ბრაიენი, სახელმწიფო დეპარტამენტში, ბოდბელ მთავარეპისკოპოსს, მეუფე იაკობსა და დემოკრატიისა და განვითარების ცენტრის აღმასრულებელ დირექტორს, ქეთევან ჩაჩავას უნდა შეხვედროდა. ამის შესახებ ინფორმაცია აშშ-ის სახელმწიფო დეპარტამენტის ვებგვერდზეა იყო განთავსებული. საგულისხმოა, რომ სანგუ-ს მიერ გავრცელებულ ინფორმაციაში, სადაც ბოდბელი მთავარეპისკოპოსი იაკობის აშშ-ში ვიზიტის დეტალებზეა საუბარი, ჯიმ ო'ბრაიენთან შეხვედრაზე არაფერი თქმულა.