რუსეთი თალიბანს ტერორისტული დაჯგუფებების სიიდან ამოიღებს. ამის შესახებ რუსული პროპაგანდისტული სააგენტო TASS, ავღანეთში რუსეთის პრეზიდენტის სპეციალურ წარმომადგენელ, ზამირ ქაბულოვზე დაყრდნობით, წერს. ინფორმაციას DW ავრცელებს.

"საგარეო საქმეთა სამინისტრო, ეფესბე-სთან და რუსეთის სხვა უწყებებთან ერთად, ამთავრებს სამართლებრივ მუშაობას თალიბების ტერორისტული დაჯგუფებების სიიდან ამოღების პროცესზე. ეს არაა სურვილის საკითხი, ამ საკითხზე ფუნდამენტური გადაწყვეტილება რუსეთის უმაღლესმა ხელისუფლებამ მიიღო, მაგრამ ყველა პროცესი რუსეთის საკანონმდებლო ჩარჩოში უნდა განხორციელდეს ", — ციტირებს სააგენტო ზამირ ქაბულოვის სიტყვებს.

DW წერს, რომ მიმდინარე წლის აპრილში რუსეთის საგარეო საქმეთა სამინისტრომ განაცხადა, რომ ისინი თალიბანისთვის ტერორისტული ორგანიზაციის სტატუსის მოხსნაზე მუშაობენ. ქაბულში რუსეთის საელჩომ, 2021 წელს, ავღანეთის ხელისუფლებაში თალიბების დაბრუნების შემდეგაც მუშაობა განაგრძო. ავღანური ტერორისტული ორგანიზაციის წარმომადგენლები რეგულარულად სტუმრობენ რუსეთს.