დღეს, საქართველოს ავტოიმპორტთა ასოციაციის ხელმძღვანელმა, ალექსი ნოზაძემ ბიზნესპრესნიუსთან განაცხადა, რომ აშშ-ის 6 ძირითადი პორტიდან 4-ის გაფიცვამ, საქართველოს მიმართულებით მანქანების გამოგზავნა შეაფერხა.

ნოზაძის თქმით გაძვირდა საზღვაო ხაზის მომსახურების საფასურიც, ხოლო ვითარების დარეგულირებას, საუკეთესო შემთხვევაში თვე ან თვე-ნახევარი დასჭირდება. შექმნილი ვითარება აისახება ავტომობილების თვითღირებულებაზეც.

„გაფიცვა რამდენიმე დღის წინ დაიწყო. აშშ-ის 6 ძირითადი პორტიდან 4-ის მუშები გაიფიცნენ. ფაქტობრივად, შეიზღუდა იქიდან ავტომობილების გამოგზავნა. სიტუაციის გამოსწორებას, დაახლოებით 1 თვე, თვე-ნახევარი დასჭირდება, ესეც საუკეთესო შემთხვევაში. იქიდან გამომდინარე, რომ კომპანიებს უკვე აქვს გარკვეული გამოწვევები, შექმნილი ვითარება, რა თქმა უნდა, გააძვირებს ავტომობილის ღირებულებას. თუმცა, ახლა გამიჭირდება იმის თქმა, ფასი რამდენით მოიმატებს. ეს დაითვლება იმის მიხედვით, როგორი იქნება ზარალი.

გარდა ამისა, საზღვაო ხაზებმა გააძვირეს გადაზიდვა, ესეც ბუნებრივია, თვითღირებულებაში აისახება. ამ ეტაპზე საკმაოდ რთული სიტუაციაა. პროდუქციის დიდი მასა დაგროვდა ამ პორტებში, ახლა უნდა მოხდეს ამის დამუშავება, ჩატვირთვა და გადინება. პორტსაც ხომ აქვს თავისი შესაძლებლობის ზღვარი,“- ამბობს ალექსი ნონიაძე.

ცნობისთვის, Reuters-ის ინფორმაციით, აშშ-ის აღმოსავლეთ და სამხრეთ პორტებში დოკერები (მტვირთავი მუშები) გაიფიცნენ, რაც სამუშაოს პირველი ყველაზე მასშტაბური შეჩერებაა 50 წლის განმავლობაში. შედეგად, ქვეყნის საზღვაო ვაჭრობის ნახევარი გაჩერდა.