ისრაელმა გუშინ, ბეირუთში ავიაიერიში განახორციელა, რომლის დროსაც სამიზნე ჰეზბოლას ყოფილი ლიდერის, ჰასან ნასრალას სავარაუდო მემკვიდრე იყო.

Axios-მა და The New York Times-მა დაადგინა, რომ თავდასხმის სამიზნე ჰაშემ საფიედინი იყო.

საფიედინი მიწისქვეშა ბუნკერში ჰეზბოლას მაღალჩინოსნებთან ერთად შეხვედრას ესწრებოდა, როდესაც თავდასხმა მოხდა — განუცხადა, NYT-ს ისრაელის მთავრობის სამმა წარმომადგენელმა.

ჯერ-ჯერობით უცნობია დაშავდა თუ არა ჰეზბოლას სავარაუდო მემკვიდრე თავდასხმისას, თუმცა როგორც ისრაელის თავდაცვის ძალები იუწყება, ჰეზბოლას სადაზვერვო შტაბ-ბინა დაიბომბა.


საფიედინი ტერორისტული ორგანიზაციის აღმასრულებელი საბჭოს ხელმძღვანელობის და ჰეზბოლას პოლიტიკური საქმეების მოგვარების გარდა ჯიჰადის საბჭოს წევრიც არის, რომელიც მართავს ჯგუფის სამხედრო ოპერაციებს. საფიედინი ნასრალას ბიძაშვილი და მის მსგავსად სასულიერო პირია. ნასრალასთან ნათესაობის და გარეგნულად მასთან მსგავსების გამო, ის ჰეზბოლას ლიდერობის მთავარ კანდიდატად ითვლება.