ამერიკის შეერთებული შტატების საელჩოში ამბობენ, რომ აშშ-ს ბიძინა ივანიშვილისათვის და მისი ოჯახის წევრებისათვის სანქციები არ დაუწესებია, — ინფორმაციას რადიო თავისუფლება ავრცელებს.

"ბიძინა ივანიშვილის ან მისი ოჯახის წევრების წინააღმდეგ შეერთებულ შტატებს ფინანსური სანქციები არ დაუწესებია. აშშ-ს სახაზინო დეპარტამენტი საჯაროდ აქვეყნებს ყველა ფინანსურ სანქციას", — მისწერეს 3 ოქტომბერს რადიო თავისუფლებას საქართველოში შეერთებული შტატების საელჩოდან.

ცნობისთვის, ტელეკომპანია ფორმულამ 2 ოქტომბერს წყაროზე დაყრდნობით გაავრცელა ცნობა, რომ ბიძინა ივანიშვილის საზღვარგარეთ მცხოვრებ შვილებს საბანკო ანგარიშებზე წვდომა შეეზღუდათ, - რომ ბანკებმა ბიძინა ივანიშვილის ოჯახის წევრებს ანგარიშების ნაწილზე წვდომა "საერთოდ შეუჩერეს", ზოგ შემთხვევაში კი "შეზღუდული საფინანსო რესურსით ოპერირების რეჟიმში გადაიყვანეს".

ივანიშვილის ოთხი შვილიდან სამი - უტა, გვანცა და ბერა ივანიშვილები - წლებია, არ ცხოვრობენ საქართველოში.

ტელეკომპანია წერს, რომ წყაროს ცნობით, "აღნიშნული ზომა გამომდინარეობს ე.წ. პრესანქციური - წინა სასანქციო რეჟიმიდან".

"ეს გულისხმობს, რომ ფინანსური ინსტიტუტები გადაწყვეტილებას ანგარიშის მფლობელის ან მასთან დაკავშირებული სუბიექტის სასანქციო რეჟიმში გადაყვანის თაობაზე იღებენ მაღალი სანდოობის მატარებელ ინფორმაციაზე დაყრდნობით, რასაც აშშ-ის ხაზინის ან სახელმწიფო დეპარტამენტი, ან ევროპული ინსტიტუტები ავრცელებენ", — აცხადებს ტელეკომპანია.

"ფორმულას" არ გაუვრცელებია ცნობა ივანიშვილის ან მისი ოჯახის წევრების ოფიციალური სანქცირების შესახებ.