ამერიკის შეერთებული შტატების ვიცე-პრეზიდენტი და დემოკრატების საპრეზიდენტო კანდიდატი, კამალა ჰარისი უკრაინის პრეზიდენტ ვოლოდიმირ ზელენსკის შეხვდა, სადაც განაცხადა, რომ უკრაინის მხრიდან ნეიტრალიტეტზე დათანხმების წინადადება პუტინის წინადადებას ჰგავს.

CNN-ის ინფორმაციით, ჰარისსა და ზელენსკის შორის შეხვედრა თეთრ სახლში შედგა, რომლის შემდეგაც ჰარისმა განაცხადა, რომ შვეიცარიაში გამართულ მშვიდობის პირველ სამიტზე, ზელენსკის უთხრა, რომ შეერთებული შტატები უკრაინის ხედვას იზიარებს ომის დასრულებასთან დაკავშირებით.

ამ შეხვედრამ, რომელიც შეერთებული შტატების საპრეზიდენტო არჩევნებიდან კვირებით ადრე შედგა, შეიძლება უკრაინის ბედი გადაწყვიტოს. ვიცე-პრეზიდენტ კამალა ჰარისისს კი შესაძლებლობა მიეცა, გამოეკვეთა მასა და დონალდ ტრამპს შორის არსებული კონფლიქტი.

CNN წერს, რომ შეხვედრების ფონზე, თეთრ სახლში, უკრაინის პრეზიდენტთან ერთად სიტყვით გამოვიდა კამალა ჰარისი, სადაც მან დონალდ ტრამპზე განაცხადა, რომ ის უკრაინას რუსი დამპყრობლებისთვის ტერიტორიების დათმობას აიძულებს.

"ბატონო პრეზიდენტო, გულწრფელად გეტყვით, ჩემს ქვეყანაში არიან ადამიანები, რომლებიც უკრაინას თავისი ქვეყნის დიდი ნაწილის დათმობას აიძულებენ, რომლებიც დაჟინებით სთხოვენ უკრაინას აღიაროს ნეიტრალიტეტი […] ეს წინადადებები პუტინის შეთავაზებების მსგავსია, განვმარტავ: ამ შეთავაზებებს არ აქვს სამშვიდობო მიზანი, მათი მიზანი კაპიტულაციაა, რომელიც სახიფათო და მიუღებელია", – განაცხადა ჰარისმა.

მედიის თქმით, ჰარისს კონკრეტულად სახელი არ დაუსახელებია, თუ ვისი მისამართით საუბრობდა, თუმცა ცხადია, რომ მიზანში ტრამპი ჰყავდა.

შეგახსენებთ, ზელენსკი ჰარისს ვაშინგტონში შეხვდა და უკრაინის "გამარჯვების გეგმა" წარუდგინა.