ევროპის საბჭოს საპარლამენტო ასამბლეის წინასაარჩევნო დელეგაციამ, რომელსაც იულიან ბულაი ხელმძღვანელობდა, საქართველოში 2-დღიანი ვიზიტი დაასრულა.

ბულაიმ აღნიშნა, რომ ეს საქართველოს ევროპული ინტეგრაციის ტრაექტორიისათვის საკვანძო მომენტია. მან ხაზი გაუსვა თავისუფალი და სამართლიანი არჩევნების მნიშვნელობას ქვეყნის ევროპულ სტრუქტურებთან მიახლოების გზაზე.

"ჩვენი დელეგაცია შეშფოთებულია, რომ პოლიტიკური ლანდშაფტის პოლარიზაციამ უპრეცედენტო დონეს მიაღწია, რაც საქართველოს დემოკრატიულ ტრაექტორიისა და საგარეო კავშირებისათვის, მოახლოებულ არჩევნებს დე ფაქტო რეფერენდუმად აქცევს. მე ვიზიარებ დელეგაციის წარმომადგენლების შეშფოთებას დემონსტრანტების დარბევისა და განსხვავებული აზრის ჩახშობის შესახებ. ხელისუფლებას მოეთხოვება ადამიანის უფლებების სტანდარტებთან შესაბამისად მოქმედება, არაპროპორციული ძალის გამოყენებისგან თავშეკავება და ძალადობის შემთხვევებზე სათანადო გამოძიების ჩატარება", — განაცხადა ბულაიმ

დელეგაციის წევრებმა შეშფოთება გამოთქვეს ოპოზიციის წარმომადგენლების წინააღმდეგ განხორციელებული ძალადობისა და მუქარის შემთხვევებზეც, ასევე სამოქალაქო სექტორის და მედიის წარმომადგენლების მიმართ ზეწოლის ფაქტებზე. PACE-ის დელეგაციამ გააკრიტიკა ანტიკორუფციული ბიუროს გადაწყვეტილებაც, რომელმაც TI-სა და აირჩიე ევროპას გაცხადებული საარჩევნო მიზნის მქონე სუბიექტების სტატუსი მიანიჭა. დელეგაცია აღნიშნავს, რომ ამას ადგილობრივ დამკვირვებლებზე მსუსხავი ეფექტი ექნება.