საქართველოს მეოთხე პრეზიდენტი, გიორგი მარგველაშვილი კოალიცია ძლიერ საქართველოს შეუერთდა. ამის შესახებ "ძლიერი საქართველოს" ლიდერმა, მამუკა ხაზარაძემ გორში მოსახლეობასთან შეხვედრისას განაცხადა.

მისი თქმით, მარგველაშვილი "პატრიოტი, უწესიერესი და უკომპრომისო მებრძოლია".

"მე მინდა ძალიან დიდი სიამაყით გითხრათ, რომ ამ ძალიან დიდ გაერთიანებას უერთდება ერთი ხმა, ერთი ძალიან სერიოზული მხარდამჭერი. ადამიანი, რომელიც არის პატრიოტი, უწესიერესი და რაც ყველაზე მთავარია, უკომპრომისო მებრძოლი თავისუფალი და ძლიერი საქართველოსთვის. მე მინდა, მივესალმოთ საქართველოს მე-4 პრეზიდენტს გიორგი მარგველაშვილს," — განაცხადა ხაზარაძემ.

გიორგი მარგველაშვილმა გორში სიტყვით გამოსვლისას განაცხადა, რომ ეს გაერთიანება არის ის, რასაც ძალიან დიდი ხანი ელოდა ამომრჩეველი და ყველაფერს გააკეთებს "საქართველოს ასაშენებლად და დასაბრუნებლად".