ირანის ახალმა პრეზიდენტმა, მასუდ პეზეშკიანმა, უკრაინის ომთან დაკავშირებით, დასავლეთთან მოლაპარაკებების სურვილი გამოთქვა, დაგმო რუსეთის აგრესია და უარყო მოსკოვისათვის რაკეტების მიწოდების შესახებ ცნობები.

"ჩვენ გვსურს, დავსხდეთ ევროპელებთან და ამერიკელებთან ერთად, გავმართოთ მოლაპარაკებები და გვქონდეს დიალოგი. ჩვენ უკრაინაში რუსეთის სამხედრო აგრესიისათვის მხარი არასდროს დაგვიჭერია", — განაცხადა პეზეშკიანმა ნიუ-იორკში, სადაც გაეროს გენერალურ ასამბლეას ესწრებოდა

სექტემბრის დასაწყისში, აშშ-მა ირანი ბალისტიკური რაკეტების რუსეთისათვის მიწოდებაში დაადანაშაულა. მასუდ პეზეშკიანმა, რეფორმისტმა პოლიტიკოსმა, რომელმაც მიმდინარე წლის ივლისში არჩევნებში ყველასათვის მოულოდნელად გაიმარჯვა, განაცხადა, რომ მისი მთავრობა ბირთვულ პროგრამასთან დაკავშირებით მოლაპარაკებების აღდგენისთვისაც მზადაა.