პრეზიდენტის სასახლეში მამუკა ხაზარაძესა და გიორგი გახარიას შორის მოლაპარაკებები გაერთიანების შესახებ, რომლის ინიციატორით საქართველოს პრეზიდენტი სალომე ზურაბიშვილია, დღეს განახლდება.

გავრცელებული ინფორმაციით, გაერთიანებასთან დაკავშირებით კონსულტაციები დღის მეორე ნახევარშია ჩანიშნული.

გუშინ, 18 სექტემბერს ორი შეხვედრა გაიმართა პრეზიდენტის სასახლეში. მამუკა ხაზარაძის თქმით, მოლაპარაკების გაჭიანურება დაკავშირებული არ არის თანამდებობების და საარჩევნო სიების განაწილებასთან, საუბარი მიმდინარეობს კონსტრუქციულად.

გიორგი გახარიას თქმით, გარკვეული შეთანხმებები შედგა, მაგრამ არის საკითხები, რომელიც დასასრულებელია. მათ შორის პარიტეტის საკითხი.

"მოლაპარაკებები ჯერ არ დასრულებულა. ძალიან დიდი იმედი მქონდა, რომ დღეს დასრულდებოდა. დასრულდება ხვალ. გარკვეული შეთანხმებები შედგა. არის რაღაც საკითხები, რომელიც დასასრულებელია.

ვთქვი, რომ დარჩენილი იყო ერთი საკითხი, რომელიც ეხებოდა პარიტეტის საკითხს. სამწუხაროდ, როგორც უნდა დალაგებულიყო ისე ვერ დალაგდა, თუმცა რაღაცნაირად გამოსავალი ვნახეთ. ახლა კიდევ არის საკითხები, ცოტა უფრო კონკრეტული, რომელიც იმედი მაქვს,რომ ხვალ დღის განმავლობაში დასრულდება, შეთანხმება იქნება მიღწეული", — განაცხადა ორბელიანების სასახლიდან, წუხელ, გვიან ღამით, გამოსულმა გიორგი გახარიამ.

შეგახსენებთ, რომ გიორგი გახარიას პარტია საქართველოსთვის და კოალიცია ძლიერი საქართველოსთვის გაერთიანების ინიციატორი სალომე ზურაბიშვილია. მან ამის შესახებ განცხადება, 17 სექტემბერს, ორბელიანების სასახლეში გამართულ ბრიფინგზე გააკეთა.

ამავე თემაზე: