თბილისში, ყაზბეგის 32ა-ში მცხოვრები მოსახლეობა მრავალსართულიანი კორპუსის მშენებლობას აპროტესტებს. ისინი დღეს დილით, მშენებლობის ადგილას შეიკრიბნენ და სამშენებლო კომპანიის მიერ დაქირავებულ მძიმე ტექნიკას გადაადგილების საშუალება არ მისცეს.

დღის მეორე ნახევარში, კომპანიის წარმომადგენლებსა და ადგილობრივ მოსახლეობას შორის დაპირისპირებაც მოხდა. რის შემდეგაც ხანდაზმული ქალი შეუძლოდ გახდა და სასწრაფო დახმარების გამოძახება გახდა საჭირო.

ყაზბეგის 32ა-ში მცხოვრები მოსახლეობა, მათ გვერდით კორპუსის მშენებლობას აპროტესტებს

ყაზბეგის 32ა-ში მცხოვრები მოსახლეობა, მათ გვერდით კორპუსის მშენებლობას აპროტესტებს

ფოტო: NEWS.On.ge

NEWS.On.ge კორპუსის ერთ-ერთ მოსახლეს ირინა ლორთქიფანიძეს ესაუბრა, მისი თქმით, აქ თავიდან 5-სართულიანი კორპუსის მშენებლობა იგეგმებოდა და ახლა 11-სართულიან კორპუსს აშენებენ, რაც მათ კორპუსს უფრო მეტად დააზიანებს. ცნობისთვის, საცხოვრებელი კორპუსი 33 სმ-ით უკვე გადახრილია. ამის შესახებ, სამხარაულისა და ორი დამოუკიდებელი ექსპერტის დასკვნაშია მოთხრობილი.

მოგვიანებით, მიმდინარე მოვლენებს კახა კალაძეც გამოეხმაურა. თბილისის მერის თქმით, აღნიშნული მშენებლობა კანონიერია, თუმცა თბილისის მერია მზადაა, მოსახლეობას ავარიული კორპუსის გამაგრებაში ან სრულად ჩანაცვლებაში დაეხმაროს

"სრული პასუხისმგებლობით გეუბნებით, რომ მშენებლობა მიმდინარეობს კანონიერად. მე ვიცნობ აღნიშნულ პრობლემას. რაც შეეხება იმ კორპუსის ავარიულობას, არაერთხელ დავაფიქსირეთ და კიდევ ერთხელ გამოვხატავთ მზაობას, რომ დავეხმაროთ ამ ადამიანებს, ხელი შევუწყოთ კორპუსის გამაგრებაში. თუ ეს წინადადება მათთვის მიუღებელია, შეგვიძლია მეორე პროექტი განვახორციელოთ — ეს არის კორპუსის ჩანაცვლება, ძველის დემონტაჟი და ახლის მშენებლობა", — განაცხადა დედაქალაქის მერმა.

მერის განცხადებას, ყაზბეგის 32ა-ში მცხოვრები ინა ბუროვა გამოეხმაურა. NEWS.On.ge- სთან საუბარში ბუროვა ამბობს, რომ მათ სჭირდებათ გარანტია, დოკუმენტურად და დადასტურებულად. მისი თქმით, "სამწუხაროდ, მხოლოდ სიტყვებს ვერ დაეყრდნობა", რადგან დრო არ იცდის, საქმე კი სიცოცხლესა და ფიზიკურ უსაფრთხოებას ეხება.

"ჩვენ გვჭირდება გარანტია, დოკუმენტურად, დადასტურებულად, რომ დაზიანებული კორპუსი სათანადოდ გამაგრდება. ჩვენ დრო არ გვაქვს, საქმე ეხება ჩვენი და ჩვენი ოჯახების უსაფრთხოებას. სამწუხაროდ ვერ დავეყრდნობით მხოლოდ სიტყვიერ დაპირებებს" — აღნიშნა ბუროვამ.