უკრაინის საელჩოდან დროებითი რწმუნებულის გაწვევის ფაქტს საქართველოს პრემიერ-მინისტრი, ირაკლი კობახიძე გამოეხმაურა. მისი თქმით, მიხაილო ხარიშინის გაწვევა ამჯერად პოლიტიკური აქტი არ არის და ის საყოფაცხოვრებო ნივთის, კერძოდ სარეცხი მანქანის შეძენას უკავშირდება.

„მაშინ ეს იყო სუფთა პოლიტიკური გადაწყვეტილება. მაშინ უკრაინის ხელისუფლებამ, იმის გამო, რომ ჩვენ არ შევუერთდით სანქციებს და არ გავგზავნეთ მთავრობის ოფიციალური თანხმობით მებრძოლი მოხალისეები უკრაინაში, გაიწვია ელჩი საქართველოდან. ეს იყო პოლიტიკური აქტი. ამ შემთხვევაში, ჩვენი ინფორმაციით, ეს არ არის პოლიტიკური აქტი. კონკრეტულმა წარმომადგენელმა, თუ არ ვცდები, დიპლომატიური სტატუსი აქვს ამასაც, შეიძინა საყოფაცხოვრებო ნივთები. ეს ჩაითვალა არაადეკვატურად, მიმდინარე ომის ფონზე და ეს გახდა მისი გაწვევის მიზეზი. ეს არის ის ინფორმაცია, რაც ჩვენ გვაქვს. ანუ, განსხვავებით ელჩის გაწვევისგან, ეს არ არის პოლიტიკური აქტი, უკავშირდება კონკრეტული საელჩოს წარმომადგენლის მიერ ისეთი საყოფაცხოვრებო ნივთის შეძენას, რომელიც მას უკრაინის ხელისუფლების მოსაზრებით, ომის პირობებში არ უნდა შეეძინა, საუბარია სარეცხ მანქანებზე“, - განაცხადა ირაკლი კობახიძემ 9 სექტემბერს გამართულ ბრიფინგზე

შეგახსნებთ, უკრაინის საგარეო საქმეთა ახალმა მინისტრმა ანდრიი სიბიგამ უკრაინის საელჩოს დროებითი რწმუნებული მიხაილო ხარიშინი 8 სექტემბერს გაიწვია. სიბიგას თქმით, ხარიშინს აბსოლუტურად არ ესმის ომში მყოფი სახელმწიფოს დიპლომატიის რეალობა.