საქართველოს პრეზიდენტის პრესსპიკერმა ეკა მიშველაძემ რუსთავის 2-ის გარშემო მიმდინარე პროცესების შეფასებისას, დღეს, 10 ივნისს,პრეზიდენტის სახელით განაცხადა, რომ ხელისუფლებისაგან დამოუკიდებელი მედიის არსებობა არის უმნიშვნელოვანესი ფაქტორი, ჯანსაღი საარჩევნო გარემოსა და ქვეყნის დემოკრატიული განვითარებისათვის.

პრეზიდენტის პრესსპიკერის განცხადებით, სტრასბურგსა და ბრიუსელში გიორგი მარგველაშვილის ვიზიტისას, ყველა შეხვედრაზე რუსთავი 2-ის საქმე იყო ძალიან მაღალი ინტერესის საგანი:

"პრეზიდენტი მოუწოდებს ამ პროცესის ყველა მხარეს შედეგები გაითვალისწინოს და მაქსიმალური სიფრთხილით მოეკიდოს მედიასთან დაკავშირებულ თემატიკას".

პრეზიდენტი მიიჩნევს, რომ ის, რაც რუსთავი 2-ის გარშემო ხდება, ამძაფრებს კითხვის ნიშნებს, როგორც ქვეყნის შიგნით, ასევე ქვეყნის გარეთაც. მისივე აზრით, არჩევნებამდე რუსთავი 2-ის მფლობელთა შეცვლა დამაზიანებელი იქნება, როგორც საარჩევნო გარემოს, ასევე არჩევნების პროცესის შეფასების თვალსაზრისით.

პრესსპიკერის თქმით, ქვეყნის პრეზიდენტისთვის მნიშვნელოვანია კერძო საკუთრების დაცვა, სასამართლოსა და მედიის დამოუკიდებლობა, თუმცა პრეზიდენტის აზრით ეს პროცესი პირველი დღიდან პოლიტიზირებული იყო, თუნდაც იმ ვითარებაში, როცა ხელისუფლების ცალკეული წარმომადგენლების მხრიდან პოლიტიკური განცხადებები კეთდებოდა.