ისრაელის ჯარებმა დატოვეს ქალაქი ჯენინი და მდინარე იორდანეს დასავლეთ სანაპიროზე მდებარე დევნილთა ბანაკი, — ინფორმაციას BBC ავრცელებს.

ამ ტერიტორიაზე ისრაელის ჯარი აგვისტოს ბოლოდან, მასშტაბური კონტრტერორისტული ოპერაციის ფარგლებში იდგა.

ჯენინში ჯავშანტექნიკითა და ბულდოზერებით რამდენიმე დღიანი რეიდის შემდეგ, დევნილებმა ბანაკში დაბრუნება დაიწყეს. აღნიშნულ ბანაკს ისრაელი პალესტინური შეიარაღებული დაჯგუფებების ბასტიონად მიიჩნევს, რომელიც ირანის დახმარებით შეიქმნა.

მედიის ცნობით, ქალაქსა და ბანაკში ისრაელის ოპერაციის დროს 21 ადამიანი მოკლეს, 130 კი დაიჭრა.