საზოგადოებრივი მაუწყებლის პირველი არხის ინფორმაციით, ხობის რაიონის სოფელ ხეთაში ორ პირს მანქანა დაეჯახა. შემთხვევის შედეგად ერთი ახალგაზრდა კაცი დაიღუპა, მეორე კი საავადმყოფოშია გადაყვანილი.

როგორც საზოგადოებრივს თვითმხილველებმა განუცხადეს, სოფელ ხეთაში, ცენტრალურ გზაზე მიმდინარე სამუშაოებზე დასაქმებულები შედუღების სამუშაოებს ასრულებდნენ, ისინი ცეცხლის ნაპერწკლების თავიდან აცილების მიზნით, მოულოდნელად გზის სავალი ნაწილისკენ გადავიდნენ, რა დროსაც ზუგდიდის მიმართულებით მოძრავი ავტომობილი შეეჯახა.

ადგილზე მობილიზებულია საპატრულო პოლიცია და მიმდინარეობს საგამოძიებო მოქმედებები.

შსს-ში On.ge-ს უთხრეს, რომ გამოძიება სისხლის სამართლის კოდექსის 276-ე მუხლით დაიწყო, რაც ტრანსპორტის მოძრაობის უსაფრთხოების ან ექსპლუატაციის წესის დარღვევას გულისხმობს.

On.ge შეეცდება გაარკვიოს, რამდენად იყო დაცული შრომის უსაფრთხოება ამ შემთხვევაში და კონკრეტულად რომელი უწყების, ან კომპანიის სამუშაოებს ასრულებდნენ მუშები, რომლებსაც მანქანა დაეჯახა. შსს-ში აცხადებენ, რომ ამ ეტაპზე მხოლოდ იმის თქმა შეუძლიათ, თუ რა მუხლითაა გამოძიება დაწყებული.