"შალვა პაპუაშვილი იმერეთშია, უმრავლესობის სახელით მე შევხვდი ბუნდესტაგის წარმომადგენლებს", - ამის შესახებ საგარეო ურთიერთობათა კომიტეტის თავმჯდომარემ, ნიკოლოზ სამხარაძემ გერმანიის ბუნდესტაგის საგარეო ურთიერთობათა კომიტეტის ფრაქციების სპიკერებთან შეხვედრის შემდეგ განაცხადა. მისივე თქმით, წინასაარჩევნო პერიოდში პარლამენტის თავმჯდომარისთვის უფრო მნიშვნელოვანია შეხვდეს საკუთარ ამომრჩეველს და მოსახლეობას, ვიდრე ნებისმიერ სხვას.

“საქართველოს მოქალაქე და მათთან შეხვედრა ყოველთვის პრიორიტეტულია. ასე უნდა იყოს ნებისმიერი პოლიტიკოსისთვის. ის ფაქტი, რომ ჩვენთვის საქართველოს მოქალაქეებთან შეხვედრაა პრიორიტეტული, ამიტომ გვაქვს ასეთი დიდი მხარდაჭერა და ამიტომ მოვიგებთ კიდევ ერთხელ არჩევნებს", — განაცხადა სამხარაძემ.

მისი თქმით შეხვედრაზე წინასაარჩევნო გარემო, უცხოური გავლენის გამჭვირვალობის შესახებ კანონი და სხვა საკითხები განიხილეს.

"რაც შეეხება შეხვედრას, შეხვედრაზე ჩვენ სხვადასხვა საკითხი განვიხილეთ. განვიხილეთ წინასაარჩევნო გარემო, “უცხოური გავლენის გამჭვირვალობის შესახებ” კანონის საკითხი, საქართველოსა და ევროკავშირს შორის ურთიერთობები, რუსეთისთვის დაკისრებული სანქციების თავიდან არიდების პოლიტიკაში საქართველოს როლი. მათ შორის, საუბარი გვქონდა საკმაოდ მძიმე გამონათქვამებზე, რომელიც ბუნდესტაგის კომიტეტის თავმჯდომარეს ჰქონდა საქართველოს ვიზიტისას. მე გერმანელ კოლეგებს მივაწოდე ინფორმაცია ამის შესახებ. ამიტომ, ძალიან ბევრ საკითხზე ვისაუბრეთ, ღია და გახსნილი დისკუსია გვქონდა", — განაცხადა ნიკოლოზ სამხარაძემ.

შეგახსენებთ, რომ ოპოზიციონერი დეპუტატების ინფორმაციით, სტუმრებთან შეხვედრაზე პარლამენტის სპიკერმა და აღმასრულებელი ხელისუფლების ლიდერებმა უარი თქვეს.