ნარკოტიკების მოხმარების დეკრიმინალიზაციის ლობისტი ჯგუფი, თეთრი ხმაურის მოძრაობა GEM Fest-ზე, ნარკოტიული საშუალების მიღების შედეგად, 22 წლის გოგოს გარდაცვალებასა და კიდევ ერთი მოქალაქის მძიმედ მოწამვლაში ძალოვან უწყებებს ადანაშაულებს.

მოძრაობა აცხადებს, რომ მოვლენების ლოგიკური ჯაჭვითაც კი, დასტურდება, რომ სახეზეა მიზანმიმართული დანაშაული:

"სამწუხაროდ მათი ძალაუფლება განუზომლად დიდია, ისინი ახდენენ გავლენას პოლიტიკურ გადაწყვეტილებებზე, საკუთარ ძალადობრივ ქმედებებს არგებენ კანონებს, ფლობენ ხალხისგან ნაძარცვ კაპიტალს, ფლობენ ინფორმაციის გავრცელების წყაროებს, რომელთა დახმარებით უკვე მესამე დღეა ცდილობენ საზოგადოებრივი აზრის შეცდომაში შეყვანას და ახორციელებენ წინასწარდაგეგმილ, კარგად მომზადებულ შეტევებს საღ აზრზე."

თეთრი ხმაურის მოძრაობაში მიაჩნიათ, რომ აღნიშნული ქმედებები ემსახურება მოახლოებულ საპარლამენტო განხილვებამდე დეკრიმინალიზაციის იდეისა და მოსალოდნელი საკანონმდებლო ცვლილებების დისკრედიტაციას. აქტივისტები მოუწოდებენ:

  • ხელისუფლებაში დეკრიმინალიზაციის მომხრეებს, ღიად დაუპირისპირდნენ აღნიშნულ ძალებს და ჩვენთან ერთად დაამარცხოთ ისინი.
  • გამოძიებას, სასწრაფოდ დადგინდეს და გასაჯაროვდეს ექსპერტიზის შედეგი, თუ რა ნივთიერებასთან გვაქვს საქმე როგორც გარდაცვლილის ისე მოწამლულთა შემთხვევაში.
  • განსაკუთრებული სიფრთხილისკენ მოვუწოდებთ ჩვენს მხარდამჭერებსა და ადამიანებს რომლებიც მოიხმარენ ნარკოტიკულ საშუალებებს. ჩვენ ყველანი ვდგავართ სიცოცხლის დაკარგვის რისკის ქვეშ, არ გვაქვს გაუაზრებელი შეცდომების დაშვების უფლება, რადგან ამით დავაზარალებთ არა მხოლოდ საკუთარ თავს, არამედ იმას რისთვისაც ვიბრძვით. მოერიდეთ უცნობ სუბსტანციებს.

მოძრაობა უსამძიმრებს დაღუპულის ოჯახსა და ახლობლებს, და აცხადებს, რომ ის არის საქართველოში მოქმედი რეპრესიული ნარკოპოლიტიკის დამცველთა მსხვერპლი.